इटहरी : क्षमताभन्दा दोब्बर विद्यार्थी कोचेर इटहरीको राजमार्गमा गुड्ने निजी तथा सामुदायिक विद्यालयका बसहरू मंगलबार कारबाहीमा परेका छन् । इटहरी उपमहानगरले अनुगमन पश्चात् राजमार्गमै रोकेर ती बसहरूलाई कारबाही गरेको हो । उपमहानगरले एकै दिन १५ वटा स्कुल बसहरूलाई अनुगमनपछि कारबाही गरेको हो ।
अभिभावक तथा सामाजिक सञ्जालमा विद्यालयका बसहरूको लापरबाहीबारे गुनासो बढेपछि मेयर हेमकर्ण पौडेल दल–बलसहित राजमार्गमा निस्किएर स्कुल बसहरूको अनुगमन गरेका थिए । अनुगमनको क्रममा इटहरी क्षेत्रका अधिकांश निजी स्कुलहरूले सिट क्षमताभन्दा बढी विद्यार्थीहरू बोकेको, साना बालबालिकाहरूलाई उभ्याएर यात्रा गराएको, र गति नियन्त्रण गर्न नसकेको जस्ता लापरबाही देखिएको जनाइएको छ ।
केही दिनयता पूर्वका मुख्य राजमार्गमा अत्यधिक दुर्घटना बढेको भन्दै सार्वजनिक बसहरूमा टाइम कार्ड लागू गरिएको थियो । सार्वजनिक बसहरूपछि विद्यालयका बसहरूको ज्यादती बढ्दै गएको गुनासो बढेपछि मंगलबार इटहरीले अनुगमनपछि कारबाही गरेको हो ।
नाबालिग विद्यार्थीहरूको सुरक्षामा लापरवाही गरी सिटमा नराखी उभ्याएर बसमा यात्रा गराएको कारण सरकारी र निजी स्कुल बसलाई कारबाही गरिएको मेयर पौडेलले बताए । मेयर पौडेलले स्कुल बसहरूको चरम लापरवाही बढेको भन्दै अनुगमनलाई निरन्तरता दिन सम्बन्धित निकायहरूलाई निर्देशन दिएका छन् । पछिल्लो समयमा इटहरी आसपासमा दुर्घटना बढेको भन्दै निरन्तर अनुगमन र पार्किङ व्यवस्थापनको काम भइरहेको उनले जानकारी दिए ।
नियमविपरीत स्कुल बसमा विद्यार्थी बोकेका विद्यालयका प्रधानाध्यापकहरूलाईसमेत विद्यार्थीहरूको सुरक्षामा लापरवाही नगर्न र उनीहरूको सुरक्षामा उच्च सतर्कता अपनाउन सचेत गराइएको इलाका प्रहरी कार्यालय इटहरीका डिएसपी भण्डारीले बताएका छन् ।
