दोहा : सद्भाव युवा समाज कतार र सद्भाव युवा समाज नेपालको संयुक्त आयोजनामा गुल्मीको एक विद्यालयमा शैक्षिक सामग्री वितरण गरिएको छ ।
जिल्लाको इस्मा गाउँपालिका वडा नं.५, रातापोखरास्थित सिद्ध आधारभूत प्राथमिक विद्यालयमा अध्ययनरत ६५ जना विद्यार्थीहरूलाई १ लाख २१ हजार बराबरको ट्र्याक सुट, स्कुल ब्याग लगायत शैक्षिक सामग्री वितरण गरिएको समाज कतारले जनाएको छ ।
विद्यालय व्यवस्थापन समितिका अध्यक्ष ज्ञान बहादुर विष्टको अध्यक्षता तथा इस्मा गाउँपालिका उपप्रमुख तथा अधिवक्ता पार्वती कुँवरको प्रमुख आतिथ्यतामा स्कुल प्राङ्गणमा सम्पन्न कार्यक्रममार्फत उक्त सामग्रीहरु हस्तान्तरण गरिएको हो । आफ्नो शुभकामना मन्तव्य राख्दै प्रमुख अतिथि कुँवरले सहयोग गर्ने संस्थाको उच्च प्रशंसा गर्दै सद्भाव युवा समाजलाई सिंगो गाउँपालिकाको र व्यक्तिगततर्फबाट धन्यवाद तथा आभार प्रकट गरिन् । कार्यक्रममा विभिन्न वैचारिक दलका प्रमुख तथा प्रतिनिधिसहित वडाध्यक्ष लगायत स्थानीय र विद्यार्थी उपस्थिति रहेको थियो । कार्यक्रममा स्कुलका छात्राहरूको साङ्गीतिक प्रस्तुति समेत दिएका थिए ।
विद्यार्थीहरूलाई ‘सद्भाव उपहार’ स्वरूप वितरण गरिएको समाज कतारले जनाएको छ । विद्यार्थीहरूलाई थोरै भए पनि सहयोग होस् भन्ने उद्देश्यले उक्त सामग्री सहयोग स्वरूप वितरण गरिएको समाजका अध्यक्ष विजय गुरुङले मध्यान्ह दैनिकसँगको कुराकानीमा बताए । उनले उक्त कार्यक्रम सम्पन्न गर्न खटिने सम्पूर्णप्रति आभार व्यक्त गरे । समाज कतारले केही दिन पहिले समाज नेपालसँग मिलेर सुनसरी जिल्लाका विभिन्न स्कुलहरूमा १ सय ४२ जना विद्यार्थीहरूलाई ‘सद्भाव उपहार’ स्वरूप ‘झोला तथा शैक्षिक सामग्री’ वितरण गरेको थियो । सद्भाव युवा समाज नेपालसँगको सहकार्यमा सुनसरी जिल्लाको बराहा क्षेत्र नगरपालिका वडा नं.९ का विभिन्न विद्यालयहरूमा उक्त सामग्री वितरण गरेको हो ।
कतारको स्थानीय कम्पनी कतार एयरवेजमा कार्यरत नेपालीहरू मिलेर स्थापना गरेको श्री सद्भाव युवा समाजले सामाजिक सदभाव र आपसी सहयोगको लागि आवश्यकता अनुसार नेपालभर नै सहयोग गरिरहेको छ । केही समय पहिले पाठेघरको क्यान्सर रोगबाट ग्रसित पर्वतको जलजला गाउँपालिका वडा नम्बर ७ धाइरिङकी ५५ वर्षीया गंगा दमाईको उपचारका लागि १७ हजार ५ सय ४० रुपैयाँ नगद सहयोग गरेको थियो भने केही दिनभित्र सिन्धुली जिल्लाका बाढी पीडित तथा काठमाडौं र कीर्तिपुरका अनाथ बालबालिकाहरूका लागि ‘माया घर’ निर्माणमा लाग्ने अध्यक्ष गुरुङले बताए ।
.jpg)
