सुर्खेत : कर्णाली प्रदेश सरकारका सामाजिक विकास मन्त्री घनश्याम भण्डारीले हिंसाजन्य घटनालाई कम गर्न लैंगिकताका आधारमा नभइ मानवीयताका दृष्टिकोणबाट व्यवहार गर्नुपर्ने बताएका छन् ।

'कार्यस्थलमा हुने हिंसा तथा यौनजन्य दुर्व्यवहार अन्त्य तथा लैंगिक हिंसा रोकथाम तथा प्रतिकार्य संयन्त्रहरुको सबलीकरणमा निजी क्षेत्रको भूमिका' विषयक अन्तरक्रिया कार्यक्रममा बोल्दै उनले मानिसले पशुलाई माया गर्ने र मानिसलाई नै दुर्व्यवहार गर्ने प्रवृत्तिका कारण हिंसा बढेको टिप्पणी गरे ।

उनले महिलाहरुलाई आर्थिक रूपमा बलियो बनाउनुपर्ने धारणा राखे । महिलालाई स्वरोजगारमा जोडेर आर्थिक उन्नयनमा जोड्नुपर्ने उनको धारणा छ । यसका लागि निजी क्षेत्रको अतुलनीय भूमिका हुने प्रष्ट पारे । 

महिलाहरुलाई सीपमुलक तालिम प्रदान गरी स्वरोजगार बनाउन सकिने उनले बताए । यसका लागि कर्णाली प्रदेश सरकार, स्थानीय तह र निजी क्षेत्रको सहकार्य आवश्यक हुने उनको भनाइ छ ।

कार्यस्थलमा हुने हिंसाजन्य व्यवहार देशभित्र मात्र नभइ सीमा पारी पनि हुने गरेको र त्यसको कारण देखासिकी बन्ने गरेको बताए । वैदेशिक रोजगारका लागि बाहिरिएका नेपालीले भोग्नुपरेको समस्याबारे चित्रण गर्दै मन्त्री भण्डारीले छोराछोरी विदेश पठाउने ट्रेन्डलाई कम गर्न निजी क्षेत्रले योगदान गर्नुपर्ने धारणा व्यक्त गरे ।