डोल्पा : हिमाली जिल्ला डोल्पामा जिल्लास्तरीय युवा मानवअधिकार रक्षक सञ्जाल गठन गरिएको छ । शुक्रबार सदरमुकाम दुनैस्थित सिद्धार्थ होटलमा एक औपचारिक कार्यक्रमका बीच तुफान डाँगीको अध्यक्षतामा जिल्लास्तरीय युवा मानव अधिकार रक्षक सञ्जाल गठन गरिएको हो । 

उपाध्यक्षमा हिरा वि.क, समावेसी उपाध्यक्षमा पवि शाही, महासचिवमा सन्देश नेपाली, सचिवमा मेनुका बुढा, सहसचिवमा लाल बहादुर बोहरा, कोषाध्यक्षमा लक्ष्मी थापासहित ३५ सदस्यीय युवा मानवअधिकार रक्षक सञ्जाल गठन गरिएको छ ।

यसैगरी जिल्ला युवा भेलामा सहभागी भएका नव–युवाहरूलाई मानव अधिकारसम्बन्धी एक दिने अभिमुखीकरण कार्यक्रम संचालन भएको छ । अभिमुखीकरण कार्यक्रममा मानवअधिकारको अवस्था र मानवअधिकार प्रवर्द्धन र संरक्षणका विषयमा मानवअधिकारकर्मी रणबहादुर कार्कीले सहजीकरण गरेका थिए । यस्तै मानवअधिकार रक्षक र भूमिका, काम कर्तव्य र अधिकारीको विषयमा पनि प्रस्तुतीकरण भएको थियो ।

गाउँ समाजमा हुने विकृति, कुरीति, मानवअधिकार उल्लंघनका विषयमा मानवअधिकार रक्षकले खबरदारी गर्नुका साथ सरोकारवाला निकायको ध्यानाकर्षण गराउनु पर्दछ ।

प्रमुख जिल्ला अधिकारी रोम बहादुर महतले मानवअधिकार रक्षक निष्पक्ष, अनुशासित र स्वतन्त्र हुनुपर्ने बताए । उनले भने, ‘गाउँ समाजमा हुने विकृतिका विषयमा आवाज उठाउनुका साथै कानुनले व्यवस्था गरेका निकायमा खबर गर्नुपर्दछ ।’

ग्रामीणमुखी युवा अभियान नेपाल (रोयम नेपाल)का कर्णाली प्रदेश संयोजक सन्तोष विकले मानव अधिकारको विषयमा बोल्न र काम गर्नका लागि अध्ययनशील र निष्पक्ष हुनुपर्ने बताए । उनले भने, ‘जिल्लामा मानवअधिकार रक्षक संजाल गठन भएको छ । संजालका सबै सदस्य संगठित भएर मानवअधिकार उल्लंघनका विषयमा आवाज उठाउनुका साथै सरोकारवाला निकायको ध्यानाकर्षण गर्नु पर्दछ ।’

रोयम नेपालले युवा मानवअधिकार रक्षक सञ्जाल गठन गर्नुका साथै बुधबार मानव अधिकारसम्बन्धी जिल्लास्थित सरोकारवाला निकायहरूसँग अभिमुखीकरण कार्यक्रम सञ्जालन गरिएको थियो ।

कार्यक्रममा डोल्पा जिल्लाका प्रमुख जिल्ला अधिकारी महत, जिल्ला प्रहरी कार्यालय डोल्पाका डिएसपी हरीकृष्ण केसी, गैर सरकारी महासंघ कर्णाली प्रदेशका सचिव रणबहादुर कार्कीलगायत जिल्लाका युवाहरूको उपस्थित रहेको थियो ।