काठमाडौं : नेपाली कांग्रेसका तीन शीर्ष नेता महाधिवेशनको सन्दर्भमा छलफलमा जुटेका छन् ।
नेतात्रय विमलेन्द्र निधि, प्रकाशमान सिंह र डा. शशांक कोइरालाबीच आज भेटवार्ता भएको छ । विरासत बोकेका नेताहरू भनेर चिनिने उनीहरूबीच उपप्रधान तथा सहरी विकासमन्त्री सिंहको निवास चक्साबारीमा भेटवार्ता भएको हो । उनीहरूलाई कांग्रेसमा तीन ‘युवराज’ भन्ने गरिन्छ ।
यसअघि गत असोज ८ गते कोइराला निवास महाराजगञ्जमा पनि यी तीन नेताबीच भेटवार्ता भएको थियो । उनीहरूबीच आगामी १५औं महाधिवेशनको बारेमा छलफल भएको छ ।
२०८२ को मंसिरमा नेपाली कांग्रेसको १५औं राष्ट्रिय महाधिवेशन हुँदैछ । विधानतः हालका सभापति शेरबहादुर देउवा सभापति हुन नपाउने हुँदा नयाँ सभापतिको खोजी भइरहेको छ । निधि, सिंह र कोइराला तीनै जना पार्टीमा सभापतिका आकांक्षीका साथै देउवा निकटका नेता हुन् ।
राजनीतिक परिवारमा जन्मे हुर्केका कोइराला, सिंह र निधिलाई कांग्रेसमा ‘विरासत’ बोकेका नेताका रूपमा चिनिन्छ । कोइराला बिपीका छोरा हुन् भने सिंह गणेशमानका र निधि महेन्द्रनारायणका छोरा हुन् ।
