जुम्ला : जुम्लाको तिला गाउँपालिकाका ३३ जना नागरिकले कुडारी त्रिवेणी र राराहिलीमा रहेको सेरी बजारको सडक अतिक्रमण हटाउन माग गरेका छन् ।
सडकका विभिन्न स्थानमा मनपरी रुपमा घर, टहरा, निर्माण भएपछि तिला ४ का स्थानीय निराजन गौत्तमको अगुवाइमा सडक अतिक्रमण हटाउन माग गरेका हुन् ।
स्थानीय राम गिरी, धनबहादुर हमाल, दिवेश बुढा, बिर्ख थापा लगायतका ३३ जना नागरिकले २०८१/७/२६ गते सडक अतिक्रमका कारण दुर्घटनाको जोखिम बढेको भन्दै संयुक्त रुपमा हस्ताक्षर गरी गाउँपालिकामा निवेदन थिएका थिए ।
त्यसअधि पनि सडक डिभिजन जुम्लाले आफ्नो कार्य क्षेत्रमा पर्ने राष्ट्रिय लोक मार्ग मध्ये नाग्मा जुम्ला सडक खण्डको छेउछाउमा अव्यवस्थित रूपमा अतिक्रमण बढेको भन्दै पटक–पटक सूचना जारी गरेको पाइन्छ । तर सडक अतिक्रम गरी बनाइएका यी स्थायी र अस्थायी टहरा बन(ाउनेहरूमा पहुँचवाला नै बढी भएकाले अहिलेसम्म हटाउन सकेका छैनन् ।
तिलाका स्थानीय ज्वारीलाल भट्टराईले नापी कार्यालय जुम्लाले रेखांकित गरे अनुसारको सडक अतिक्रम गरी बनेका सबै संरचना हटाउन नसकेको र समयसीमा पनि सकिएको बताए ।
उनका अनुसार कर्णाली राजमार्ग अन्तर्गत जुम्लाको तिलागाउँपालिकास्थित कुडारी त्रिवेणी र रारालिहीको सेरी बजारमा सडक अतिक्रमण गरी बनाइएका घरटहरा तथा निर्माण सामग्रीका सवारी दुर्घटनाको जोखिम बढेको छ । उनले भने,‘सडक डिभिजन जुम्लाको पटक–पटकको सूचना टाँस गर्ने गरेको देखिन्छ । नागरिकको दवावमा विभिन्न मितिमा तिलागाउँपालिका र वडाकार्यालयबाट पनि सडकमा अतिक्रमण हटाउने विषयमा सूचना जारी गरेको पाइन्छ ।’ जिम्मेवारी निकायले सूचना टाँस्दै झारा टार्दै गरेपछि रारालिहीको सेरी बजारका केही टहरा हटाएपनि कुडारी त्रिवेणी बजार क्षेत्रका सडक अतिक्रम नहटेको हो ।
त्यस्तै तिलाका अर्का स्थानीय स्थानीय भरतराज गिरीका अनुसार यस भन्दा अघिल्लो सरकारका पालामा पनि सडक अतिक्रमण हटाउने सूचना जारी भएको थियो । यसरी पटक–पटक आफैले जारी गरेको निर्णय र सूचनालाई कार्यान्वन गर्न नसक्नुले स्थानीय सरकारको कमजोरी रहेको उनले बताए । सरकारले सडक अतिक्रमण हटाउनका लागि तीव्र रुपमा लिनुपर्ने हो । तर नागरिक आफै जागुरुप हुँदा समेत खासै चासो नदिएको उनीहरुको गुनासो छ ।
त्यस्तै तिला ३ का वडाध्यक्ष धनबहादुर शाहीले सडकमा बनेको अव्यवस्थित घरटहरा हटाउनका लागि पत्रचार गरेको बताए । उनले सडकले कार्यान्वय गरेको खण्डमा जनप्रतिनिधिको साथ हुने बताए । यसअघि सडक फराकिलो नहुँदा मोटरसाइकल चालकले पाँच वर्षीय बालकलाई ठक्कर दिँदा बालक घाइते भएको र चालक फरार भएको समेत त्यहाँका स्थानीय बताउँछन् । त्यस्तै गाउँपालिका अध्यक्ष मोतिला
ल रोकायाले अतिक्रमण हटाउने विषय प्राथमिकता रहेको बताए । उनले गाउँपालिकाले पटक–पटक सूचना जारी गर्नुका साथै सडकलाई पनि पत्राचार समेत गरेको छ । उनले भने,‘रारालिही, सेरी बजारमा केहीले अतिक्रमण हटाएका छन् । अब सबै ठाउँमा कार्यान्वयन गर्नतर्फ लागि पर्नेछौं ।’
त्यस्तै सडक डिभिजन कार्यालय जुम्लाका प्रमुख दिपेन्द्र कुमार चौधरीले सार्वजनिक सडक तथा सडक सीमा अतिक्रमण हटाउने सम्बन्धी सूचना जारी गर्दै आएको बताए । उनका अनुसार यहाँको स्थानीयको सहयोग चाहिएको छ । कर्णाली राजमार्गको जुम्ला, नाग्मा सडकखण्ड अन्तर्गत सडक अतिक्रम हटाउन लागि पर्ने बताए । डिभिजन कार्यालयले अतिक्रमण गरी बनाएका टहरा, थुपारिएको माटो आदि सात दिनभित्र हटाउन पटक–पटक सूचना जारी गरेपनि कार्यान्वयन नभएको जुम्लाका स्थानीयको गुनासो छ ।
त्यस्तै सार्वजनिक सडक ऐन २०३१ को दफा १९ (३)बमोजिम सडकमा बनाइएका घरटहरा हटाउनु परेको खण्डमा लाग्ने खर्च सम्बन्धित व्यक्तिबाटनै असुल उपर गरिने उल्लेख छ भने सडक सबैको साझा सम्पत्ति भएपनि दिनप्रति दिन यसरी अतिक्रम बढ्दै जाँदा यहाँको सरोकारवाला निकाय भने मौन बसेको पाइन्छ ।
सडक डिभिजन जुम्लाका प्रमुख चौधरीले सडक अतिक्रमण गरी सडकभित्र बनाइएको घर टहराको तथ्यांक आफ्नो पालिकामा नरहेको तर पालिकासँग समन्वय गर्दै आएको बताए । सडक अतिक्रमण गरेरै जुम्लादेखि नाग्मा खण्डमा दर्जनौँ घर, टहरा निर्माण भएपनि यसको यकिन तथ्यांक सडक डिभिजन कार्यालय जुम्लासँग छैन । जुम्लामा सडक अतिक्रमणले एकातिर सडक साँघुरिँदै गएका छन् भने अर्कोतिर दुर्घटनाको जोखिम बढेको छ ।
