विराटनगर : कोशी प्रदेशका उद्योग कृषि तथा सहकारी मन्त्री खगेनसीं हाङ्गामले आफ्नो सय दिने उपलब्धी सार्वजनिक गरेका छन् । मन्त्री भएर आएपछि मन्त्रालयले गरेको कार्य प्रगति र उपलब्धिको बारेमा बिहीबार पत्रकार सम्मेलन गरी मन्त्रीले उपलब्धी सार्वजनिक गरेका हुन् ।
सय दिनको उपलब्धी सार्वजनिक गर्दै मन्त्री हाङ्गामले केही ऐन र नीतिगत निर्णय गरेर मात्रै कार्यान्वयन गर्न सकिने भएकोले लामो समय सहकारी क्षेत्रको समस्या समाधान गर्न सहकारी संस्थाहरूको सफ्टवेयर प्रयोग सम्बन्धी कार्यविधि पारित भएसँगै १७ वटा सफ्टवेयर कम्पनी सूचीकृत भएको जानकारी दिए ।
उनले १ हजार ३ सय सहकारीहरूले सफ्टवेयरमा जोडिएका समेत बताए । मन्त्री हाङ्गामले सय दिने कार्य प्रगतिमा संकटग्रस्त सहकारी समस्या समाधान गर्न केही प्रदेश ऐनलाई संशोधन गर्न बनेको अध्यादेशबाट समिति गठन गर्ने बाटो खोलेको समेत उल्लेख गरे ।
‘मन्त्री परिषद्ले पुस १८ गतेको बैठकबाट समिति गठन भइसकेको छ,’ हाङ्गामले भने, ‘यसले संकटग्रस्त सहकारीको समस्या समाधान गर्नको लागि व्यवस्थापन समिति गठन गर्ने प्रक्रिया अघि बढेको छ ।’
मन्त्रीले यो अवधिमा १० स्थानीय तहलाई खोरेत मुक्त बनाउन जेनिङसहित खोप कार्यक्रम संचालनमा रहेको, खोरेत रोग आयोजना संचालन कार्यविधि बनेको, कृषि ब्यवसाय संचालन कृषि अनुदान कार्यक्रम तथा सहुलियतपूर्ण कृषि कर्जा संचालनमा रहेको जानकारी दिए ।
पत्रकार सम्मेलनमा उद्योग कृषि तथा सहकारी मन्त्रालयका सचिव डा.शरणकुमार पाण्डेले बजेट कार्यान्वयन गर्न केही प्राविधिक समस्याहरू देखिएपनि अब समाधान भएर गएको बताए । उनले अहिले बजेट कार्यान्वयनलाई प्रभावकारी बनाउने काम भइरहेको समेत जानकारी दिए ।
