पथरी : लेटाङमा जारी प्रथम अन्तरपालिका नकआउट फुटबल प्रतियोगिताको उपाधि पथरीशनिश्चरे नगरपालिकाले जितेको छ । शनिबार भएको फाइनल खेलमा लेटाङ नगरपालिकालाई ३–१ गोल अन्तरले पराजित गर्दै पथरीशनिश्चरे उपाधि जितेको हो ।
सुरुवाती अग्रता जोगाउन नसक्दा लेटाङ उपविजेतामा सीमित भयो । विजेता टिमले ट्रफीसहित १ लाख नगद प्राप्त गर्दा लेटाङले ५० हजार नगद प्राप्त गर्यो ।
फाइनल खेलमा लेटाङका लागि सौलेन तामाङले सुरुवाती अग्रता दिलाएका थिए । खेलको २१औं मिनेटमा गोल गरे । दोस्रो हाफमा पथरी खेलमा फर्कियो । पथरीका लागि सौर्य राउतले दोस्रो हाफको ८औं मिनेटमा बराबरी गोल गरे । राउतले नै दोस्रो हाफको १५औं मिनेटमा गोल गर्दै २–१ को अग्रता बनाए । पथरीशनिश्चरेका लागि दोस्रो हाफको ३४औं मिनेटमा मिक्चेन दासले गोल गरे । खेलको म्यान अफ दि म्याच पथरीशनिश्चरेका राउत घोषित भए ।
विधागत उत्कृष्टमा पथरीशनिश्चरेका समीर क्षेत्री उत्कृष्ट गोलकिपर, पथरीशनिश्चरेका सुवास तामाङ उत्कृष्ट डिफेन्डर, लेटाङका सन्दीप ठाडा मगर उत्कृष्ट मिडफिल्डर तथा पथरीशनिश्चरेका सौरे राउत उत्कृष्ट स्ट्राइकर घोषित भए । पथरीशनिश्चरेका मिक्चेन दास प्रतियोगिताको सर्वोत्कृष्ट खेलाडी घोषित भए । लेटाङका सौगात राई उदयीमान खेलाडी घोषित भए ।
प्रतियोगिताका प्रमुख अतिथि लेटाङ नगरपालिकाका प्रमुख भुपेन्द्र लावतीले विजेता तथा उपविजेता टोलीलाई पुरस्कार प्रदान गरे । उज्यालो जीवन प्रतिष्ठानको आयोजना तथा चिसाङ भ्याली क्लबको सहआयोजनामा प्रस्तावित बुद्ध रंगशालामा प्रतियोगिता आयोजना भएको हो ।
