काठमाडौं : नेपाल एसबीआई बैंकको प्रमुख कार्यकारी अधिकृत (सीईओ) र प्रबन्ध सञ्चालकमा रामकुमार तिवारी नियुक्त भएका छन् । उनलाई भारतीय स्टेट बैंकले नेपालका लागि सीईओ बनाएको हो । उनलाई माघ ३ गते बसेको सञ्चालक समितिको ५२४औँ बैठकले नेपाल एसबीआई बैंकको सीईओमा नियुक्त गरेको हो ।
उनको कार्यकाल बिहीबारबाट नै सुरु भएको जनाइएको छ । यसअघि पनि उनी भारतीय स्टेट बैंकमा नै कार्यरत थिए । यसअघि सो बैंकको सीईओमा दिपक कुमार दे कार्यरत रहेका थिए । कार्यकाल सकिएसँगै उनलाई भारतीय स्टेट बैंकले फिर्ता बोलाएको छ । तिवारी १७ वर्षदेखि भारतीय स्टेट बैंक अफ इन्डियामा कार्यरत छन् । उनी हाल उक्त बैंकको जनरल म्यानेजर हुन् ।
