.jpg)
अर्घाखाँची : मालारानी गाउँपालिकाले घरघरमै पुगेर ज्येष्ठ नागरिकलाई रेडियो र टर्च लाइट वितरण गरेको छ ।
जेष्ठ नागरिकहरुले घरमै बसेर देशविदेश र जिल्लाका कुना काप्चाका समाचार, सूचना सुन्ने र मनोरञ्जनका लागि सहज होस् भनेर गाउँपालिकाले रेडियो र टर्च लाइट वितरण गरेको हो ।
गाउँपालिका अध्यक्ष दलबहादुर भट्टराईले गाउँपालिकाले चालु आर्थिक २०८१/०८२ को वार्षिक स्वीकृति कार्यक्रममा समावेश गरी रेडियो र टर्च लाइट वितरण गरिरहेको बताए ।
गाउँपालिका उपाध्यक्ष दिपा पोख्रेलले गाउँपालिकाको कार्यक्रमहरु तथा जेष्ठ नागरिक विपन्न परिवारलाई यस वर्षदेखि सूचनाको पहुँच आम नागरिकको घर–घरमा पुर्याउने उद्देश्यले बजेट विनियोजन गरेर रेडियो वितरण कार्यक्रम राखिएको बताइन् ।
गाउँपालिकाले हालसम्म एक सय ६० जनालाई रेडियो र लाइट वितरण गरेको छ ।
गाउँपालिकाले एक हजार ५ सय रेडियो वितरण गर्ने लक्ष्य राखेको छ । पालिकाले ७० वर्षमाथिका ज्येष्ठ नागरिकलाई रेडियो वितरण सुरु गरेको हो । गाउँका धेरैजसो घरमा पछिल्लो समय ज्येष्ठ नागरिक एक्लिँदै गएको पनि उपाध्यक्ष पोख्रेलले बताइन् ।
‘ज्येष्ठ नागरिकलाई सुरक्षा भत्ता दिएर मात्र हुँदैन, उनीहरूका चाहना र आवश्यकता पनि बुझ्नुपर्छ’, उनले भनिन्, ‘भत्ताले मात्रै सबैका सबैखाले आवश्यकता पूरा हुँदैनन् ।’
.jpg)
