अर्घाखाँची : युवायुवतीलाई स्वरोजगार तथा आत्मनिर्भर बनाउने उद्देश्यका साथ अर्घाखाँची सन्धिखर्क नगरपालिकामा  सीपमूलक प्लम्बिङ तालिम सुरु भएको छ ।  

५० दिनसम्म चल्ने तालिमको  एक समारोहकाबीच सन्धिखर्क नगरपालिकाका नगरप्रमुख कृष्णप्रसाद श्रेष्ठले  उद्घाटन गरेका छन् । नगरपालिकाको आयोजनामा भएको तालिममा १२  वटै वडाका ५० जना युवालाई २९ विद्यामा तालिम दिन सुरु गरिएको छ ।

युवाहरूलाई स्वरोजगार र स्वउद्यमी बनाउन तथा बजारको माग अनुसार दक्ष जनशक्ति तयार पार्न यो तालिमको आयोजना गरिएको सन्धिखर्क नगरपालिकाका  प्रमुख  श्रेष्ठले  बताए ।

युवाहरूमा व्याप्त निराशा हटाउन र देशबाट पलायन भइरहेका युवायुवतीलाई स्वदेशमै रोजगारीका अवसर सृजना गर्न सकियोस् भनेर यो तालिम आयोजना गरिएको नगरप्रमुख श्रेष्ठको भनाइ छ । 

युवाहरूलाई उद्यमशीलतातर्फ उन्मुख गराउन, स्वरोजगार बनाउन र विदेशतिर भइरहेको पलायन रोक्न संघीय सरकार, प्रदेश सरकार र सबै पालिकाले यस्ता सीप तथा रोजगारमूलक तालिम आयोजना गर्न जरुरी रहेको नगरपालिकाका प्रमुख प्रशासकीय अधिकृत खिमानन्द भुसालले बताए । 

यो तालिमबाट  युवाहरूलाई स्वउद्यमी बन्न र स्टार्टअप व्यवसायका लागि पनि उत्प्रेरित गर्ने भुसालको भनाइ छ । बजारको माग अनुसार आवश्यक २९ विधामा तालिम दिइन लागिएको वडा नम्बर १ का अध्यक्ष माधब श्रेष्ठले बताए ।