काठमाडौं : नेपालका लागि कतारी राजदूत युसुफ बिन मोहम्मेद अल हैलले आफ्नो देशमा कामदार पठाउने श्रोत मुलुकमा सिण्डिकेट खडा नगर्ने भन्दै नेपालमा पनि सिण्डिकेट खडा नहुने बताएका छन् । नेपाल वैदेशिक रोजगार व्यवसायी संघका अध्यक्ष विष्णुप्रसाद गैरे र महासचिव सुजितकुमार श्रेष्ठले बिहीबार नेपालका लागि कतारी राजदूत अल हैल र कन्सुलर खालिफा अहमेद अल–मादेदसँग भेट गरी ‘कतार सिण्डिकेट’ बारे छलफल गरेका थिए ।
जवाफमा राजदूत हैलले कतार सरकार कुनै पनि एकाधिकारलाई स्वीकार नगर्ने र विभिन्न अनलाइन तथा पत्रपत्रिकामा आएको खबरमा कुनै सत्यता नभएको जानकारी गराएको महासचिव श्रेष्ठले बताए । संघले भने कतारको रोजगारीमा सिण्डिकेटको तयार भइरहेको दाबी गर्दै आएको छ ।
संघकै निवदेनमा छलफल गरी प्रतिनिधिसभाको उद्योग तथा वाणिज्य र श्रम तथा उपभोक्ता हित समितिले एक हप्ताभित्र प्रतिवेदन पेश गर्न श्रम, रोजगार तथा सामाजिक सुरक्षा मन्त्रालयलाई निर्देशन दिएको छ । उक्त निर्देशनपछि मन्त्रालयले कतारको रोजगारीमा सम्भावित सिण्डिकेट बारे अध्ययन गरी प्रतिवेदन पेश गर्न वैदेशिक रोजगार विभागका महानिर्देशक कुमारप्रसाद दाहालको संयोजकत्वमा एक समिति गठन गरेको छ । समितिको पहिलो बैठक बिहीबार बसेको छ । समितिले चर्चामा आएका १७ वटा व्यवसायी संस्थाका सञ्चालकहरुलाई सोधपुछ गर्ने निर्णय गरेको छ ।
नेपाली कामदारको प्रमुख रोजगार गन्तव्य कतारमा १७ वटा म्यानपावरले मात्रै पठाउने गरी सिण्डिकेट खडा गर्न खोजिएको समाचार सार्वजनिक भएपछि कुनैपनि प्रकारको सिण्डिकेट अस्वीकार गर्ने भन्दै छानविनको माग गर्दै आएको छ । संघसँगको छलफलमा कतारी राजदूत हैलले अप्रमाणित र तथ्यहीन समाचार सार्वजनिक भएको भन्दै गुनासो समेत गरेका छन् ।
राजदूत हैलले पर्याप्त अनुसन्धान र प्रमाणित तथ्यविना नै नेपालको संसदीय समिति जस्तो माथिल्लो निकायमा छलफल गर्न हतार गर्नुले आफुहरु आश्चर्यमा परेको गुनासो गरेको भन्दै कतार सधैंभरी मर्यादित भर्ना प्रक्रिया ‘फेयर रिक्रुट्मेन्ट’को पक्षमा रहेको जानकारी दिएको महासचिव श्रेष्ठले बताए । आफुहरुले सिण्किकेट कतार सरकारले लगाउन लागेको नभइ नेपालमा अनुचित तरिकाले खडा गर्न प्रपञ्च भएको भन्दै त्यसलाई कतार सरकारमाथि नेपालले औंला उठाएको रुपमा नबुझ्न आग्रह गरेको बताए ।
त्यसैगरी संघले कतारको सरकारी कम्पनीहरुमा नेपालबाट कामदार लैजाने विषयमा संघसँग सहकार्य गर्न प्रस्ताव गरेको छ । त्यस विषयमा दूतावासले सकारात्मक जवाफ दिएको भन्दै महासचिव श्रेष्ठले भविश्यका दिनमा नजिक रहेर काम गर्ने प्रतिवद्धता जनाएको समेत बताए ।
महासचिव श्रेष्ठले दूतावासले सिण्डिकेट लगाउने कुनै तयारी नभएको आश्वासन दिएपनि मन्त्रालयद्वारा गठित छानविन समितिले यस विषयमा गहिरोरुपमा अध्ययन गरी ठोस् निष्कर्ष निकाल्नु आवश्यक भएको बताए । विगतमा कोरियामा कामदार पठाउन लुम्बिनी ओभरसीजलाई छनोट गरेदेखिका विभिन्न समयका घटनाले विश्वस्त भइहाल्ने अवस्था नरहेको समेत महासचिव श्रेष्ठले टिप्पणी गरे ।
त्यस अवसरमा दूतावासले संघ प्रतिनिधि मण्डललाई दूतावासले सन् २०२२ मा कतारमा हुने विश्वकप फुटबलको स्मारिका प्रदान गर्दै उक्त प्रतियोगित सफलतापूर्वक सम्पन्न गर्न नेपालबाट लैजाने आवश्यक जनशक्ति आपुर्ति गर्दा सहकार्य गर्नेसमेत आश्वासन दिएको महासचिव श्रेष्ठले जानकारी दिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies