मंगलबार संभवतः ६ महिना यताकै न्यून संख्यामा कोरोना संक्रमण पुष्टि भयो । स्वास्थ्य तथा जनसंख्या मन्त्रालयले दिएको २४ घण्टे अपडेट अनुसार, मंगलबार ५०२ जनामा संक्रमण पुष्टि भएको छ । जबकी, कुनै बेला एकैदिन ६ हजार हाराहारीमा संक्रमण पुष्टि हुने गरेको थियो । तर, स्वास्थ्य मन्त्रालयको अनुमानकै बिपरीत संक्रमण दर न्यून बनेर गएको तथ्याङ्कले देखाउँछ । किनभने, मन्त्रालयले दशैंतिहारका बेला संक्रमण उच्च संख्यामा पुग्ने अनुमान सार्वजनिक गरेको थियो ।
तर, तिहारको भोलिपल्ट संक्रमण दर तीन अंकमा मात्रै झरेन, पाँच सयकै हाराहारीमा रहन गयो । यसले नेपालमा संक्रमण घटेको भनी भन्न सजिलो बनेको छ । तर, मृतक संख्या भने घटेको छैन । मंगलबार एकैदिन १७ जनाको मृत्यु भएको तथ्याङ्क सरकारले नै सार्वजनिक गरेको छ । अर्कोतिर, पीसीआर परीक्षण समेत ठूलो संख्यामा घटेको छ । मंगलबार तीन हजार पीसीआर रिपोर्टको नतिजा सार्वजनिक गरिएको हो ।
त्यसो हुँदा संक्रमण घटेको नभएर परीक्षण चाहिँ घटेको बुझ्न गाह्रो पर्दैन । हुनुपर्ने चाहिँ संक्रमण दर जति बढिरहेको छ, उतिकै संख्यामा पीसीआर परीक्षण बढाउनुपर्ने हो । किनभने, नागरिकको जीवन रक्षा सरकारको दायित्व हो । यदि, मृत्यु दर नै घटेर शून्यतिर लाग्यो भने चाहिँ सन्तोष मान्न सकिन्छ । तर नेपालमा संक्रमण नघटेको तथ्य भने बुधवारकै नतिजाले पुष्टि गरेको छ । मंगलबार भन्दा दोब्बर अर्थात् ६ हजार ७३१ जनाको पीसीआर रिपोर्ट सार्वजनिक हुँदा एक हजार ४२ जनामा संक्रमण पुष्टि भएको छ । अर्थात्, कुनैबेला परीक्षण भएको उच्चतम संख्याको एक तिहाइ जतिको रिपोर्ट सार्वजनिक हुँदा एक दिनअघिको तुलनामा संक्रमण झण्डै तीन गुणना बढेको छ । यसले नेपालमा महामारीको रुप डरलाग्दो अवस्थामा रहेको लुक्दैन ।
तर यस्तो बेला सत्तारुढ नेपाल कम्युनिष्ट पार्टी (नेकपा) का नेताहरु भने पार्टीभित्रकै कलहमा अल्मलिएका छन् । एकले अर्कालाई गम्भीर आरोपपत्र तयार पार्ने काम रोकिएको छैन । बुधवारको सचिवालय बैठकबाटै अध्यक्ष एवम् प्रधानमन्त्री केपी शर्मा ओलीले पुष्पकमल दाहाल प्रचण्डले लगाएको आरोपपत्रको जवाफी पत्र तयार पार्ने भन्दै दश दिनको समय मागेका छन् । यसले नेकपा नेतृत्व मुलुकले खेपिरहेको संकटप्रति गम्भीर बन्न नसकेको पुष्टि हुन्छ । यसलाई ‘भाइस भर्सा’ नेकपाभित्रको आन्तरिक कलहले महामारी झनै खतराउन्मुख रहेको पनि भन्न सकिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies