काठमाडौँ : दक्षिण कोरियाका राष्ट्रपति युन सुक योलमाथिको महाभियोग संवैधानिक अदालतले पनि सदर गरेको छ । यससँगै उनी पदमा फर्किने बाटो बन्द भएको छ । संवैधानिक अदालतले सर्वसम्मतिले संसदबाट पारित भएको महाभियोगलाई अनुमोदन गर्दै उनलाई पदच्युत गरिदिएको हो ।

युनले केही समयअघि मार्शल लको घोषणा गरेका थिए । उनले उत्तर कोरियाबाट खतरा र राजनीतिक गतिरोधलाई कारण देखाउँदै मार्शल ल लागू गरेपछि व्यापक विरोध भएको थियो । त्यसकै कारण उनीमाथि महाअभियोग लगाइएको थियो ।

युन सुक योललाई महाअभियोग लागेपछि त्यहाँका प्रधानमन्त्री हान डक-सू कार्यवाहक राष्ट्रपति बनेका छन् । उनलाई पनि महाअभियोग लगाइएको थियो, तर अदालतले उनको महाअभियोग खारेज गरिदिएको थियो ।

युन सुक योल पदमुक्त हुने दक्षिण कोरियाका दोस्रो राष्ट्रपति बनेका छन् । यसअघि सन् २०१७ मा पार्क ग्युन-हे पनि महाभियोगपछि पदच्युत भएका थिए । अदालतको निर्णयअनुसार, अब ६० दिनभित्र दक्षिण कोरियामा नयाँ राष्ट्रपति चयनका लागि निर्वाचन गर्नुपर्नेछ ।