सहबान अन्सारी/मध्यान्ह
नवलपरासी : नेपाल–भारत सीमाअन्तर्गत नवलपरासीका विभिन्न क्षेत्रमा अवैध रुपमा ओसार–पोसार भइरहेको अवस्थामा २ लाख रुपैयाँ बढीका मालसमान प्रहरीले बरामद गरेको छ । भारतबाट अवैध रुपमा ल्याउँदै तथा नेपालबाट भारततर्फ लैजाँदै गरेको २ लाख ३ हजार २ सय मूल्य बराबरको अवैध मालसामान प्रहरीले नियन्त्रणमा लिएको हो ।
सोमबार जिल्लाको सरावल गाउँपालिका वडा नम्बर ७ झरही खोला भएर भारतबाट नेपालतर्फ अबैधरुपमा ल्याउदै गरेको १ लाख ८१ हजार ६ सय मूल्य बराबरको लत्ताकपडा प्रहरीले बरामद गरेको छ ।
सीमा प्रहरी चौकी महेशपुरबाट खटिएको प्रहरी टोलीले सुटको कपडा ३६ मिटर, थान कपडा १९६ मिटर, साडी ३० पिस र लेडिज सल १९ पिस गरी १ लाख ८१ हजार ६ सय रुपैयाँ बराबरको लत्ताकपडा बरामद गरेको हो । सोही चौकीबाटै खटिएको टोलीले भारतबाट डो¥याएर ल्याइँदै गरिएका २ राँगा समेत नियन्त्रणमा लिएको छ ।
सरावल गाउँपालिका वडा नम्बर ७ झरही खोला हुँदै नेपालबाट अवैध रुपमा भारततर्फ लैजाँदै गरेको अन्दाजी २१ हजार ६ सय मूल्य बराबरको १८ कार्टून किसमिस मदिरा प्रहरीले नियन्त्रणमा लिएको छ ।
प्रहरीका अनुसार सीमा क्षेत्रबाट अवैध रुपमा मोटरसाइकलमा राखी कपडा र मदिरा तस्करी गर्नेहरु भने भागेका छन् । सीमा क्षेत्रबाट तस्करी गर्न लागिएको मालसामान छाडेर उनीहरु मोटरसाइकलसहित फरार भएका हुन् ।
यस्तै, भारतबाट डोर्याएर राँगो ल्याउँदै गरेकाहरु पनि प्रहरी टोलीलाई देखेर भागेका जनाइएको छ । मानिसहरु फरार भए पनि नियन्त्रणमा लिएको सम्पूर्ण मालसामान आवश्यक कारबाहीको लागि महेशपुर भन्सार कार्यालय बुझाइएको जिल्ला प्रहरी कार्यालय नवलपरासीले जनाएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies