काठमाडौं : इजरायल र प्यालेष्टाइनबीच तनाव बढ्दै जाँदा वैदेशिक रोजगारीका लागि इजरायलमा रहेका नेपालीहरु समस्यामा पर्न सक्ने देखिएको छ । इजरायलस्थित नेपाली दूतावासले बुधबार एक सूचना जारी गर्दै इजरायल र प्यालेष्टाइनबीच तनाव बढ्दै गएको भन्दै सुरक्षित रहन त्यहाँ रहेका नेपालीलाई आग्रह गरेको छ ।
हाल इजरायलमा पाँच हजार बढी नेपाली रहेका छन् । समस्या परेमा दूतावास वा इजरायलमा क्रियाशील नेपाली संघसंस्थाका प्रतिनिधिहरुलाई सम्पर्क गर्नसमेत अपिल गरिएको छ ।
मंगलबार राति मात्रै गाजाबाट तेल अभिभलाई निशाना बनाई १ सय ८० भन्दा बढी रकेट प्रहार भएका थिए । दूतावासले केही दिनदेखि जेरुसेलम र इजरायलको दक्षिणी क्षेत्रमा सैयौं रकेट आक्रमण भएको नेपाली दूतावासले जनाएको छ ।
इजरायली सेनाले हवाई आक्रमण गरेर गाजास्थित हमास समूहको एउटा कार्यालय भवन भत्काइ दिएको छ । इजरायलले पछिल्लो ३८ घण्टामा प्यालेष्टिाइन चरमपन्थीहरुले एक हजार रकेट प्रहर गरेको बताएको छ । संयुक्त राष्ट्रसंघले तनाव बढेर युद्धको अवस्थामा प्रवेश गर्नसक्ने भन्दै चिन्ता व्यक्त गरेको छ ।
नेपाली दूतावासले सूचनामा दुई मुलुकबीचको आक्रमण प्रत्याक्रमणले त्रसित तुल्याएको भन्दै सम्भव भएसम्मका सुरक्षाका उपायहरुको खोजी गर्दै सुरक्षित रही नआत्तिन आग्रह गरेको छ । घरभित्र भए साइरन बज्नासाथ झ्याल नजिक नगई बंकर, भर्याङ वा त्यस्तै सुरक्षित क्षेत्रमा जान, घरबाहिर बजार, सडक, फार्म वा अन्यत्र भए नजिकैको बंकरमा पुगिहाल्न र त्यो उपलब्ध नभए उपलब्ध सुरक्षाका उपाय अबलम्बन गर्न पनि आग्रह गरिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies