कोरियोग्राफर अश्विनीकान्त झा यो क्षेत्रमा एक्लो बृहस्पिति जस्तै छन् । उनले नेपाली कोरियोग्राफीको क्षेत्रमा एक खालको उचाइ चुम्न सफल भएका छन् । झाले पूर्वीय भजन, शास्त्रीय गीतलाई र्याप्ममा उतारेर थप चर्चा बटुल्न सफल भएका थिए । यो एउटा नयाँ कन्सेप्ट थियो । त्यो निक्कै सफल भयो र अत्यधिक रुचाइयो पनि । यतिबेला मिसेस नेपाल वल्र्डको तयारीमा रहेका झासँग मध्यान्ह दैनिकका लागि प्रतिक्षा गौतमले गरेको कुराकानी :
यतिवेला के गर्दै हुनुहुन्छ ?
हामी यतिबेला कोरोना संक्रमणका कारण सरकारले यसलाई नियन्त्रण र रोकथाम गर्नका लागि गरेको निषेधाज्ञामा छौं । पछिल्लो समय केही खुकुलो भएको छ । यद्यपि संक्रमण भने कम भएको छैन । संक्रमितको संख्यामा कमी आएको छैन । म पनि घरमा नै बसिरहेको छु । यो फुर्सदको समयमा अलिक बढी क्रियटिभ हुन पाएको मैले महसुस गरेको छु । विश्व बजारमा फेशन क्षेत्रमा के कस्ता परिवर्तन भइरहेका छन् । त्यसको अध्ययन गरिरहेको छु । आगामी कार्यक्रम कसरी गर्ने भन्ने कार्य योजनामा छु । यस्तै मिसेस नेपाल वल्र्डको तयारीमा छु ।
कोरोना संक्रमण बढ्दो छ, यतिवेला हामी कोरोना संक्रमणको दोस्रो लहरको चपेटामा छौं । यसले कतिको असर पुर्याएको छ यो क्षेत्रलाई ?
हामीले समयमा नै यसको असरलाई पहिचान गरी त्यसको रोकथाम र नियन्त्रणका लागि उचित कदम चाल्न सकेनौं । जसले गर्दा अहिलेको अवस्थाबाट हामी गुज्रिन बाध्य भएका छौ । मनोरञ्जनको सम्पूर्ण क्षेत्रसँगै ब्युटि प्याजेन्टको क्षेत्र पहिलो कोरोना लहरमा पनि नराम्ररी प्रभावित भयो । अहिले यसले झन् हामीलाई असर पुर्याएको छ ।
यस्तो अवस्थामा अब आगामी दिन कसरी अगाडि बढ्छ होला ?
यस्तोमा अब बिस्तारै अगाडि बढ्नुको विकल्प छैन । हामीले जुन धार बनाइसकेका छौं व्युटि प्याजेन्टको क्षेत्रमा यसलार्ई अगाडि बढाउनु पर्छ । जुन हामीले मिस नेपालको क्षेत्रमा २५, २६ वर्ष यात्रालाई हेरौं, मिसेस नेपालको १०, १२ वर्षको यात्रालाई हेरौं, मिसेस नेपाल वल्र्ड जुन पहिलो पल्ट हुँदै छ यसलाई अब हामीले हामीमा जे जति स्रोत, साधान र क्षमता छ त्यसलाई प्रयोग गर्दै जानु पर्छ भन्ने लाग्छ । हामीले बन्द त गर्नै मिल्दैन, कसरी वैकल्पिक तरिकाले हुन्छ अगाडि बढाउँदै जानुपर्छ । सधैं यस्तो अवस्था त नहोला तर यो अवस्था लामो समयसम्म रह्यो भने भर्चुअल वा स्टुडियो कन्सेप्टमा कार्यक्रम अगाडि बढाउनु पर्छ ।
नेपालमा हुने हरेक ब्युटी प्याजेन्टमा आश्विनीकान्त झालाई देखिने गर्छ । यस्तो पनि लाग्छ कि आश्विनी झा बिना कुनै ब्युटी प्याजेन्ट सम्भव नै हुँँदैन कि क्या हो ? आश्विनी झा र नेपालका ब्युटी प्याजेन्ट एक अर्काका पुरक जस्तै भएका छन् । यो क्षेत्रमा तपाईं एक्लो बृहस्पति हुनुहुन्छ भन्ने छ नि ?
यसमा चाहीँ म के भन्न चाहन्छु भने यस्ता प्रतियोगिता आयोजकहरूले मलाई रुचाइदिनु भएको छ । प्रतियोगितामा सहभागीहरूलाई पनि मैले दिने ट्रेनिङ सायद उहाँँहरूलाई राम्रो लाग्छ । म अलिकति अपडेटेड भएर अन्तर्राष्ट्रिय स्तरमा यस्तो भइरहेको छ भनेर मैले दिने प्रस्तुतिलाई रुचाएर यस्तो भएको होला । म आफैँँ पनि बाहिर ट्रनिङ लिएर आएँ । हरेक प्रस्तुतिलाई नयाँ तरिकाले प्रस्तुत गर्ने कोशिसमा हुन्छु म त्यसैले होला भन्ने लाग्छ । म हरेक राष्ट्रिय तथा अन्तर्राष्ट्रिय प्याजेन्टहरूमा उपस्थित भएर गरिएका कामलाई उतिकै प्राथमिकता दिने गर्छु । म हरेक कामलाई यस्तो गर्ने कोशिस गर्छु कि काम नै खुशी होस् कि यो काम अश्विनीले गर्दै छ भनेर । मेरो मिहेनत र लगाव र कामको प्राथमिकताले नै हो जस्तो लाग्छ सबैले मनपराइदिनुहुन्छ । फेरि म कुनै पनि गाह्रो कामलाई सजिलो तरिकाले प्रस्तुत गर्ने र त्यही अनुसार विद्यार्थीलाई सिकाउने कोशिसमा हुन्छु । जसको कारणले स्टेजमा उत्कृष्ट प्रस्तुति आउने गर्दछ ।
तपाईंले पूर्वीय भजनलाई पनि र्याप्मा उतार्नु भयो होइन ?
हो, मैले विश्वमा पहिलो पल्ट यस्तो प्रयोग गरेको हुँ । पूर्वीय भजन, शास्त्रिय गीतलाई र्याप्ममा उतारेको थिएँ । यो एउटा नयाँ कन्सेप्ट थियो । त्यो निक्कै सफल भयो र अत्यधिक रुचाइयो पनि ।
यहाँँले अहिलेसम्म आउँदा धेरैलाई ट्रेनिङ दिइ सक्नुभएको छ, ट्रेनिङमा महत्वपूर्ण हुनै पर्ने कुरा के हो ?
हामी दुई पार्टबाट कुरा गर्दै छौं, एउटा फेशन शो र अर्काे ब्युटी प्याजेन्ट । ब्युटी प्याजेन्टमा ट्रेनरले व्यक्तिलाई प्रोडक्टका रुपमा हेर्ने गर्छ । त्यो व्यक्तिमा कम्पिलट निखार ल्याउनु पर्यो । त्यो व्यक्तिको आत्म विश्वास, त्यो व्यक्तिको स्टेजको प्रस्तुति, त्यो व्यक्तिको प्रश्नको उत्तरदिने शैली, भाषा, शब्द यो सबै कुरामा हामी काम गर्छै । हिजो उहाँ अडिसनमा आउँदा जुन अवस्थामा हुनुहुन्थ्यो पछि फाइनलमा उहाँलाई हेर्छौ त्यही ट्रान्सफरमेशनका लागि हामी काम गर्छौ । हामीले व्यक्तिको सम्पूर्ण व्यक्तित्व विकासमा मद्दत पुग्ने गरी काम गर्छौ । त्यसैगरी फेशन शोमा हामीले डिजाइनरको रचना या कुनै प्रोडक्टलाई मोडलमार्फत उत्कृष्ट ढंगले र्याम्प वा दर्शकमाझ प्रस्तुत गर्छौं ।
नेपालमा फेशन र व्युटी प्याजेटनको अवस्था कस्तो छ ?
मलाई लाग्छ यो क्षेत्रमा झण्डै ५० करोड भन्दा माथिको वार्षिक ट्रान्जेक्सन छ । ५० करोडको ट्रान्जेक्सन भनेको कुनै पनि क्षेत्रलाई स्थायित्व दिनका लागि पर्याप्त हो भन्ने लाग्छ । आगामी दिनमा अझ राम्रो हुने छ । पछिल्लो समय विभिन्न उमेर समूहका जस्तै बालबालिकादेखि लिएर युवा युवती र प्रौड अवस्थाका व्यक्तिमा पनि व्युटि प्याजेन्ट प्रति क्रेज बढ्दै गएको छ । जसले गर्दा यो आमरुपमा गएको छ । देशव्यापीरुपमा हामीले ठूलो स्थान पाएका छौं । अहिले कोरोनाका कारण केही कालो बादल लागेको जस्तो देखिए पनि आगामी दिनमा आशाका सुनौलो किरणाहरु देख्दै छु ।
नेपालमा हुने ब्युटी प्याजेन्ट विवादरहीत भएको कम नै पाइन्छ नि ?
म फेशन कोरियोग्राफर र ब्युटी प्याजेन्ट ट्रेनर भएको हिसावले जुन तपाईंले प्रतियोगितामा आउने विवादको कुरा उप्काउनु भयो यसलाई म के भन्छु भने एउटा सिक्काको दुई वटा पाटा हुन्छ, मैले देखेको पाटो हेड हुन सक्छ अर्कोले टेल देखेको हुन सक्छ । मेरो जजमेन्ट हेडबाट भएको हुन सक्छ र अर्कोले टेलबाट गरेको हुन सक्छ । यसलाई प्राक्टिकल रुपमा बुझ्दा त्यहाँ जित एउटाको भएको हुन्छ र हार्नेहरू धेरै हुन्छन् । हरेकलाई केही न केही असन्तुष्टि हुन्छ । त्यो असन्तुष्टिमा जब हार्ने बेन्च सबै एक भइदिए पछि आरोप लगाउन सजिलो छ । यो मैले बास्तबिकता बताउन खोजेको हो । यसको मतलब सबै प्याजेन्ट अर्गेनाइजर ठिक छन् भन्न खोजेको चाहीँ होइन । यो विशुद्ध व्यक्तिको बौद्धिकता क्षमता जाँच्ने पाटो हो तर यसलाई केही व्यक्तिले व्यापार बनाउँदा तपाईंले भने जस्तै यस्ता समस्याहरू आएका छन् । अब हामीले प्रतियोगिता गराउने संस्था कस्तो हो त्यो बुझेर मात्रै भाग लिनुपर्छ । गलत कुराको आवाज उठाउनु पर्छ ।
तपाईं यो क्षेत्रमा रहेर आफूले के पाएँ जस्तो लाग्छ ?
मेरो कुरा गर्दा पनि म शुरुमा काठमाडौं आउँदा डाक्टर बन्ने भन्ने थियो । त्यसपछि समयक्रममा कुनै बेला गायक बन्ने मोह पनि चल्यो । यस्तै एक्टर बन्ने भुत पनि सवार भयो । समय सँगसँगै मोडलिङबाट कोरियोग्राफीमा आएँ । यसमा आएपछि मलाई लाग्यो मेरो क्षेत्र यही हो । यसमा म केही उल्लेखनीय कार्य गर्न सक्छु भन्ने लाग्यो । यसमा राम्रो गर्न सक्छु भन्ने लाग्यो र पूर्णरुपमा यही क्षेत्रमा होमिएँ । मलाई लाग्छ यो क्षेत्रमा म सफल पनि भएको छु । मैले आजसम्म जे जति नाम र पहिचान, प्रतिष्ठा, सम्मानसँगै आर्थिकपक्षमा सवल पाटो यही क्षेत्रबाट आर्जन गरेको छु ।
यो क्षेत्रमा नयाँ आउँन चाहनेलाई के भन्नुहुन्छ ?
कुनै पनि क्षेत्रमा सफलताका लागि कडा परिश्रम र आफ्नो काम प्रतिको लगाव र इमानदारिता जरुरी छ । पढेर, बुझेर धैर्यताका साथ आउनुभयो भने यस क्षेत्रमा आउन चाहनेको भविष्य राम्रो छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies