चितवन : पूर्वपश्चिम रेलमार्गको सर्भे गर्न भन्दै चितवन आएको एक कम्पनीको गाडीमा स्थानीय बासिन्दाले आगजनी गरेका छन् ।
भरतपुर महागनरपालिका- ७ का बासिन्दाको एक समूहले बागमती प्रदेश ०१, ०३० च ७१९० नम्बरको गाडी जलाएका हुन् ।
सर्भे गर्न गएका टोलीलाई भने प्रहरीले सुरक्षा दिएको छ । स्थानीयले सो स्थानबाट रेलमार्ग बनाउँन नहुँने भन्दै अवरोध गरेका हुन् ।
सरकारबाट अनुमति लिएर पूर्वपश्चिम रेलमार्गको सर्वेक्षण गर्न आएको बताएको आरएच कन्सल्टेन्सीको सवारी साधान र उपकरण स्थानीयले कब्जामा लिएका थिए । त्यसपछि उनीहरुले प्रहरीकै अगाडि गाडीमा आगजनी गरेका हुन् ।
गाडीमा लागेको आगो भरतपुर महानगरपालिकाको दमकलले निभाएको छ ।
पूर्वपश्चिम रेलमार्ग भरतपुरका विभिन्न घना बस्ती भएका वडाबाट जाने गरी सर्भे गरिएको भन्दै स्थानीय बासिन्दाले चरणबद्ध संघर्षका कार्यक्रम गर्दै आएका छन् ।
बस्तीलाई उजाड बनाएर रेल मार्ग लैजान नदिने र अहिले गरिएको सर्भे नै परिवर्तन गर्नुपर्ने माग उनीहरुले गर्दै आएका छन् ।
