चितवन : स्टार स्पोर्ट युवा क्लब बरुवाको आयोजनामा जारी राष्ट्रिय स्तरको फुटबल प्रतियोगितामा अभिषेक चर्च रजहर नवलपुर सेमिफाइनलमा प्रवेश गरेको छ ।
चैनपुर फुटबल क्लब माडीलाई टाइब्रेकरमा ४–२ गोल अन्तरले पराजित गर्दै रजहर सेमिफाइनलमा पुग्ने पहिलो टोली बनेको हो । निर्धारित समयमा दुवै टोलीले कुनै गोल गर्न नसकेपछि खेल टाइब्रेकरमा धकेलिएको थियो ।
सो खेलको ‘म्यान अफ द म्याच’ अभिषेक चर्च रजहरका गोलरक्षक अनुप राना घोषित भएको आयोजक क्लबका पूर्वसचिव टिकाराम सुवेदीले जानकारी दिए ।
प्रतियोगिताअन्तर्गत शनिबार दोस्रो क्वाटरफाइनल खेलमा सूर्यपुर फुटबल क्लब चितवन र वीरगञ्ज युथ एकेडेमीबीच प्रतिस्पर्धा हुने सुवेदीले बताए ।
३०औं संस्करणको स्टार कप फुटबल प्रतियोगिता बरुवामा हरितालिका तिज र जितियाको अवसर पारेर आयोजना गरिएको हो । विजेता टोलीले ट्रफी, मेडल र प्रमाणपत्रसहित नगद पुरस्कार २ लाख ५१ हजार १ सय ११ रुपैयाँ प्राप्त गर्नेछ ।
त्यस्तै, उपविजेता टोलीले मेडल र प्रमाणपत्रसहित नगद १ लाख २५ हजार ५ सय ५५ रुपैयाँ पाउनेछ । विधागत उत्कृष्ट खेलाडीलाई समेत पुरस्कार प्रदान गरिने आयोजक क्लबका अध्यक्ष सन्देश बरालले जानकारी दिए । प्रतियोगितामा १० टोलीको सहभागिता रहेको छ ।
