– अनुसा थापा
विश्वको अधिकांश मुलुकमा कोरोनाको नयाँ भेरियन्ट देखापरेको छ । विभिन्न राष्ट्रले नयाँ भेरियन्टबाट आफ्ना नागरिक बचाउन धेरै स्वास्थ्य मापदण्ड र नीतिहरु कडाईपूर्वक अपनाएका छन् । ओमिक्रोन नामक भाइरसबाट बच्न हरेक राष्ट्रले सक्दो प्रयास गरिरहेका छन् । हाम्रै छिमेकी देशहरुले पनि हवाई उडानलगायतका कतिपय कुराहरुमा कडाई गरेका छन् । विज्ञहरुले समेत यस भाइरसबाट बच्न आग्रह गरिरहेका छन् । तर, नेपालमा भने यस भाइरसलाई वेवास्था गरिएको छ । स्वास्थ्य मापदण्डको पालना नगरि मानिसहरु जथाभावी दौडिएका छन् । कोरोनाको नयाँ भेरियन्टलाई कसैले गम्भीरता साथ हेरेका छैनन् ।
कोभिडको दोस्रो लहर नसकिँदै खोलिएको मठमन्दिरमा भक्तजनहरुको पुजाआजा गर्न भीड लाग्ने गरेको छ । मन्दिरमा दर्शन गर्ने, भजनकृतन गाउने भन्दै बुढाबुढीदेखि लिएर महिलाहरु बालबच्चासमेत बोकेर आउने गरेका छन् । सरकारले पटक–पटक स्वास्थ्य मापदण्डको पालना गर्न भनेता पनि हेलचेक््रयाइ गरेर मास्क नै नलगाई मन्दिरामा दर्शन आउनेको घुँइचो देख्न सकिन्छ । मन्दिरमा भएका भीडले कोरोना बढ्ने संज्ञा दिएको छ । यदि कोरोनाबाट जनता बचाउनु छ भने संस्कृति, पर्यटन तथा नागरिक उड्डयान मन्त्रालयले मठमन्दिर दर्शनमा कडाई गर्नुपर्छ । मठमन्दिर मात्र बन्द गरियो भने कोरोना नियन्त्रण गर्न सरकारलाई निकै सघाउ पुग्छ ।
रात्रिकालिन व्यवसायी, पार्टीप्यालेस, होटल व्यवसाय जस्ता भीडभाड हुने स्थानलाई उच्च निगरानीमा राखेर स्वास्थ्य मापदण्ड अबिलम्ब लगाउनुपर्छ । मानिसहरुको बढी भीडभाड हुने क्षेत्रमा मालपोत, यातायात कार्यालय र राहदानी बनाउने कार्यालयमा पनि अति ध्यान दिनु आवश्यक छ ।
बैंक तथा वित्तीय संस्थाहरु पनि मापदण्डलाई कडाईपूर्वक लागु गराउनुपर्छ । सरकारले बनाएको मापदण्ड पालना गर्नमा बैंक तथा वित्तीय संस्थाहरु यसअघि पनि चुकेको देखिएको थियो । कोरोनाको निकै जोखिम बढाउने सार्वजनिक यातायातमा पनि अनिवार्य मास्कदेखि स्वास्थ्य मापदण्ड पालनामा कडाई गर्नुपर्छ । यता, सरकारी वा निजी विधालयले पनि हेल्थ प्रोटोकलको पालना गरेका छैनन् । विधालयमा सामाजिक दुरीको पालना गर्नु असम्भव जस्तै देखिन्छ । विधार्थीहरुले मास्कसमेत लगाएका छैनन् । अहिले बालबालिका कोरोनाको घेरामा घेरिएका छन् । बालबालिकाले मास्क लगाउदैनन् भने विधालयले स्यानिटाइजर व्यवस्थासमेत गरेको छैनन् । सरकारले बालबालिकाहरुलाई कोरोनाको नयाँ भेरियन्टबाट टाढा राख्न कि प्रभावकारी ढंगले सामाजिक दुरीको पालना गर्न लगाउनुपर्छ ।
चुनाव नजिकिएसंगै राजनीतिक दलहरुको महाधिवेशन, बैठक, सभाजस्ता गतिविधिहरुले स्थान पाएका छन् । दलहरु आफै कोरोनालाई साइडमा राखेर भेला गर्दै हिँडेका छन् । राजनीतिक दलका सबैजसो कार्यक्रमहरुमा स्वास्थ्य मापदण्डको उल्लंघन भएको देखिन्छ ।
दक्षिणतर्फको खुला सीमाका कारण पनि नेपालमा कोरोनाको जोखिम बढी छ । राज्यले जोखिमलाई ध्यान दिँदै दक्षिणतर्फको नाकामा केही मापदण्ड बनाउन आवश्यक छ । यसअघि पनि दक्षिणतर्फको नाकाबाट नेपालमा कोरोना संक्रमितहरु भित्रिएका थिए । नेपालका अधिकांश नागरिकहरु रोजगारीको लागि भारत गएका छन् । नेपालमा पनि भारतीयको संख्या उल्लेखीय छ ।
भारतमा कोरोना संक्रमणको दर बढेसंगै नेपालीहरु धमाधम आफैं देश फर्किदै छन् । तर, नाकामा कोरोनाको परीक्षण भएको छैन् । भारतबाट नेपाल आउनेहरु सिधैं आफ्नो घर धाइरहेको छन् । जसले गाँउ र टोललाई नै खतरामा पारेको छ ।
ठूला–ठूला व्यापारिक मल, सुपर मार्केटहरु जस्तैः भाटभटेनी, बिग मार्ट, लबिम मलमा पनि सरकारले बनाएको मापदण्ड पालना भएको छैन् । सिनेमा घरहरुले पनि अलिक लापरबाही नै गरेका छन् । घरघरमा कबाडी सामान लिन आउनेलाई कोरोनाको बारे मतलब छैन् । फुटपाथ व्यापारी, ठेलागाडा व्यापारी र कराना पसलेले पैसाभन्दा अरु केही देखेका छैन् । सडक छेउछाउ पुरै ढाकेर बसेका फुटपाथ व्यापारीहरुले पनि स्वास्थ्य मापदण्डको पालना गरेको छैनन् ।
उपत्यकामा जनघनत्व बढी भएको कारण पनि कोरोनाको जोखिम अन्यत्रभन्दा धेर गुणा बढी छ । उपत्यकाका नगरहरुले यसअघि जस्तै क्रमिक रुपमा स्वास्थ्य मापदण्ड लागु गर्ने विषयमा कार्यक्रमहरु बनाउनुपर्छ । यति गरिदिने हो भने उपत्यकाबासीले कोरोना लाग्ने डरबाट अलिकति भएपनि राहत पाउथे । यदि केही गरि कोरोनाले विकराल रुप लियो भने उपत्यकामा व्यवस्थापन गर्न धेरै सकस पर्नेछ ।
कोरोनाको नयाँ भेरियन्ट ‘ओमिक्रोन’ यसअघिको भन्दा बढी जोखिमयुक्त भएको भन्ने स्वास्थ्य विज्ञहरुको भनाईका आधारमा पनि सरकारले यसमा उचित ध्यान दिन आवश्यक छ । कोरोनाको नयाँ भेरियन्टबाट देशका नागरिकहरुलाई बचाउन सरकारले आवश्यक नीति बनाउने बेला आएको छ । स्वास्थ्य मापदण्डका कुराहरुलाई अबदेखि नै कडाईपूर्वक पालना गराउन आवश्यक देखिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies