– घनश्याम डल्लाकोटी, पूर्वी चितवन
१.
काम धेरै गर्नेहरू भन्दा कुरा धेरै गर्नेहरू देख्छु यहाँ,
आफ्ना ती कामै छोडेर, कान धेरै भर्नेहरू देख्छु यहाँ,
उब्जाउनेहरू मरिरहन्छन्, खानेहरू बसेर खाइरहन्छन्,
आफ्ना स्वार्थ पूरा नभए, भ्रम धेरै छर्नेहरू देख्छु यहाँ ।।
२
तिमीलाई थाहा छ कतिखेर कस्लाई उल्ट्याउनु पर्छ,
कोसँग बदला लिनु छ, अनि कस्लाई गुल्ट्याउनु पर्छ,
भ्रममै रहेछु म पनि, तिमी एउटा असल मानव भन्दै,
छोड तिम्रो जाल–झेल, मनलाई अब सुल्टयाउनु पर्छ ।।
३
देश र पार्टी तिमीलाई जनताले दिएको पेवा भएछ,
सत्यनारायण पुजाको प्रसाद अपुङ्गो र मेवा भएछ,
सत्ताको कुर्सीमा पुगेपछि, कुर्सी मोह कति साह्रो,
देशको टेवा बन्छु भन्थ्यौ, देशै पो तिम्रो टेवा भएछ ।।
४
नियालेर आफ्नै मनको मैलो हेर,
कसैको घर पस्नु अघि दैलो हेर,
अर्काकै ढुकुटी हेरी किन जल्छौ,
सानै भएपनि आफ्नै थैलो हेर ।।
५
अझै पनि देश भ्रष्टाचारको जालो भयो,
व्यवस्था फेरियो घाउ फेरि आलो भयो,
नातावाद, फरियावादमै अल्झियो देश,
मन्त्रालयको पीए मन्त्रीकै सालो भयो ।।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies