काठमाडौं : काठमाडौं उपत्यकामा हैजा संक्रमणका बिरामी फेला परेका छन् । ललितपुरका एक किशोर हैजा संक्रमित भएको शुक्रराज ट्रपिकल तथा सरुवा रोग अस्पतालले पुष्टि गरेको छ । अन्य दुई जनामा हैजाको लक्षण देखिएको छ । अस्पतालका अनुसार उपचारका लागि पुगेका ललितपुरका १६ वर्षका किशोरमा हैजाको संक्रमण फेला परेको हो ।
अस्पतालका अनुसार ति किशोर गत शुक्रबार उपचारका लागि अस्पताल पुगेका थिए । मंगलबार हैजा पुष्टि भएको हो ।
चिकित्सकहरूका अनुसार आरटी रिपोर्टमा हैजा पोजेटिभ देखिएपछि अस्पताल भर्ना गरिएको थियो । हैजाको संक्रमण पुष्टि भएपछि ति किशोरलाई टेकुमै राखिएको छ । उनको आइसोलेसनमा राखेर उपचार भइराखेको छ ।
अस्पतालका अनुसार हैजा पुष्टि भएका किशोर ललितपुरको गोदावरी नगरपालिका वडा नम्बर १४ का हुन् । गोदावरी बाटै अन्य दुई–तीनजनालाई अस्पताल ल्याएर परिक्षण गरिएको छ । आइसियूमा उपचाररत एकजनालाई हैजाका लक्षण देखिएको छ । लक्षण देखिएकालाई परीक्षणका लागि राष्ट्रिय जनस्वास्थ्य प्रयोगशालामा कल्चर गराउन पठाइएको छ । तर, हैजा संक्रमण भए/नभएको पुष्टि भएको छैन ।
हैजाका संक्रमण देखिएका तेस्रो व्यक्तिको रिपोर्ट आउन बाँकी छ ।
यसैगरी, उपत्यकामा पोलियो पनि भेटिएको छ । उपत्यकाका विभिन्न ५ ठाउँको ढलबाट महिनाको २ पटक नमूना लिएर पोलियोको भाइरस भए नभएको हेर्ने गरिएको छ । यही क्रममा २०८१ जेठ १३ गते काठमाडौँको टुकुचा र बागमती दोभानमा वागमती नदीतर्फको खण्डबाट ढलबाट आएको पानी नमूनाका रुपमा लिइएको थियो । उक्त नमूनामा डिप्राइभ्ड पोलियोको भाइरस–३ भेटिएको हो । यसको रिपोर्ट २०८१ असार २९ गते आएको थियो । प्रयोगशाला परीक्षणमा यो भाइरस मुखबाट दिइने पोलियो भाइरसको उत्परिवर्तन भएको पत्ता लागेको चिकित्सकहरू बताउँछन् ।
यसपछि काठमाडौं महानगरपालिकाले ५ बर्षमुनिका बालबालिकालाई पोलियो थोपा खुवाउने योजना बनाएको छ ।
काठमाडौँ महानगरपालिकाको स्वास्थ्य विभागले विशेष पोलियो खोप अभियान चलाउन लागेको हो । अभियान आजै देखि शुरु हुनेछ ।
यसअघि नियमित खोप लिएका बालबालिकालाई समेत यसपटक खोप अनिवार्य गरिएको महानगरपालिकाले जनाएको छ ।
