उदयपुर : उदयपुरको एक हाइड्रोपावर दुई वर्षदेखि बन्द हुँदा स्थानीय अन्धकारमा बस्न बाध्य भएका छन् । जिल्लाको ताप्ली गाउँपालिका वडा नं. ४ अन्तर्गत रिगुलीमा रहेको राकुला हाइड्रोपावरको नहर वर्षाले बगाएको छ भने पावर हाउसका उपकरणहरु समेत बिग्रिएको अवस्था छ ।
२५ किलोवाटको हाइड्रोपावर बन्द हुँदा हुँदा रिगुली, थुम्की, जतनपुर, लगायत गाउँका स्थानीय अन्धकारमा बस्न बाध्य भएका छन् । वर्षातले नहर बगाउने गरेको तथा पावर हाउसको उपकरण बिग्रिएर २ वर्षदेखि विद्युत बन्द भएको स्थानीयले बताएका छन् ।
ताप्ली गाउँपालिका ४ का वडाअध्यक्ष उमेश मगरले उक्त पावर हाउसबाट रिगुली, खोलागाउँ, भीरगाउँ, ठानागाउँ, थुम्की लगायत गाउँका ३ सय घरधुरीले बिजुली बाल्ने गरेको बताए । वडाअध्यक्ष मगरले सो पावर हाउस सञ्चालनको लागि कहिकतै पहल कदमी नभएको समेत बताए ।
राकुली हाइड्रोपावर निर्माण समितिका अध्यक्ष डिग बहादुर ठकुरीले अनुमानित १ करोड २५ लाख लागतमा हाइड्रोपावर निर्माण सम्पन्न भएसँगै सञ्चालनमा रहेको २५ किलोवाट बिजुली उत्पादन दिइरहेको सो पावर हाउसले गाउँ विकास समिति हुँदाको अवधिमा १,२,३,४,५,६,९ वडाका ३ सय घरधुरीले बत्ती बाल्ने गरेको बताए ।
ठकुरीले पावर हाउसको एल्सी बोर्ड बिग्रिएको र जेनेरेटरमा समस्या आउनुका साथै विद्युत महसुल उठ्न, मर्मत र प्राविधिक खर्च व्यवस्थापनमा समस्या भएको बताए । उनले पावर हाउस सञ्चालनको लागि पालिकाले बजेट नछुट्याएको र महंगो भएतापनि बिजुली बिक्री वितरणको लागि राष्ट्रिय प्रशारण लाइनमा जोड्ने विषयमा प्रदेश र केन्द्र सरकारसँग पहल गरिएको भएतापनि सकारात्मक नदेखिएको र सहयोगबाट पछि हट्दै समुदायले नै सञ्चालन गर्नु पर्नेमा जोड दिइएको बताए ।
नेपाल विद्युत वितरण शाखा उदयपुरको प्रमुख विजय बाबु खत्रीले बिजुली बत्ती बाल्नका लागि लाइन विस्तारसँगै पोल, मिटरबक्स, तार, ट्रान्समिटर जडान लगायत कार्यहरु धमाधम भइरहेको बताए ।
खत्रीले बिजुलीको लाइन विस्तारसँगै बिजुली बाल्ने काम पनि भएको बताए । ताप्ली गाउँपालिकाका अध्यक्ष ढुङ्गराज विकले राकुला हाइड्रोपावर सञ्चालनको लागि केही पहल कदमी अगाडि नबढाइएको जानकारी दिए ।
