काठमाडौं : परराष्ट्रमन्त्री आरजु राणाका अनुसार रुसी सेनामा रहेका नेपालीहरूले स्वदेश फर्कन चाहन्छन् । उनका अनुसार दुई देशको युद्धमा परेका ३२३ जनाले उद्धारका लागि निवेदन नै दिएका छन् भने सरकारको रेकर्डमा ११६ जना सम्पर्कविहीन रहेका छन् ।
बुधबार प्रतिनिधि सभाको अन्तर्राष्ट्रिय सम्बन्ध तथा पर्यटन समितिको बैठकमा परराष्ट्रमन्त्री राणाले यस्तो जानकारी गराएकी हुन् । उद्धारका लागि उच्च कूटनीतिक तहमा निरन्तर पहल भइरहेको उनले बताइन् । मस्कोस्थित नेपाली राजदूतावासले समन्वय गरी रुसी सेनाबाट नेपाल फर्काउन पहल गरिरहेको उनको भनाइ छ ।
नेपाली कांग्रेसका सांसद उदय शमशेर जबराले रुस र युक्रेन युद्धमा नेपालीहरू रहेको र उनीहरू रोजगारीको खोजीमा त्यहाँ पुगेको बताएका थिए । नेपालको कुनै सरोकार नभएको विषयमा नेपालीहरू नै रुस र युक्रेनको पक्षमा रहेर लडिरहेको भन्दै सरकारको ध्यानार्षण गरेका थिए ।
यस सम्बन्धमा अन्य सांसदहरूल समेत जानकारी माग गरेका थिए । जवाफमा परराष्ट्रमन्त्री राणाले रुस र युक्रेन युद्धमा परेका ३२३ जना नेपालीको उद्धारका लागि परराष्ट्र मन्त्रालयमा निवेदन दिएको जानकारी दिइन् । सम्पर्कमै नरहेको भनी खोजी र फिर्ताका लागि निवेदन दिएको संख्या ११६ जना रहेको पनि उनले बताइन् ।
उद्धारका लागि उच्च कूटनीतिक तहमा निरन्तर पहल भइरहेको र थप सक्रियता लिने उनको प्रतिवद्धता छ । मस्कोस्थित नेपाली राजदूतावासले समन्वय गरी रुसी सेनाबाट नेपाल फर्काउन पहल भइरहेको पनि उनले जानकारी दिइन् ।
परराष्ट्र मन्त्रालयका अनुसार हालसम्म रुसी सेनामा ज्यान गुमाएकाको संख्या ३४ जना रहेको छ । डीएनए परीक्षणका लागि दिइएको संख्या २२ रहेको छ । युक्रेनमा ६ जना युद्धबन्दीको रुपमा रहेका छन् ।
घाइते भई उपचाररत ५ जनामध्ये एक जना नेपाल फर्किएका छन् । यसका अलावा रुस पुगेकामध्ये १५० जना नेपाल फर्किएका छन् ।
बाँकी नेपाल फर्किनेहरूका लागि समेत सरकारले सक्रियताका साथ काम गर्ने परराष्ट्रमन्त्री राणाको प्रतिवद्धता छ ।
रुस र युक्रेन दुवै मुलुकसँग नेपालको कूटनीतिक सम्बन्ध छ । तर, दुई देशबीच जारी युद्धसँग नेपालको कुनै सरोकार छैन । तथापि, युद्धमा दुवै देशको पक्षबाट लड्न नेपालीहरू समेत सेनामा सामेल भएपछि नेपालको सरोकार जोडिएको हो । नेपालले दुवै सेनामा भर्ती नहुन नेपालीहरूलाई भनेको छ । दुवै देशलाई नेपालले आफ्ना नागरिकलाई स्वदेश फर्काइदिन भनेको छ । तर, नेपालको पहलले सार्थकता लिन नसकेको भनेर आलोचना समेत हुने गरेको छ ।
