काठमाडौँ : रुसका राष्ट्रपति भ्यादमिर पुटिन भारत भ्रमणमा छन् । उनी दुईदिने भारत भ्रमणका लागि बिहीबार नयाँ दिल्ली आइपुगेका हुन् ।
राष्ट्रपति पुटिनलाई लिन भारतीय प्रधानमन्त्री नरेन्द्र मोदी स्वयं पालम एयरपोर्टमा पुगे । स्वागतका क्रममा दुवै नेताले गला मिलाए ।
यी दुवै शक्ति राष्ट्रका प्रमुख हुन् । पुटिन शुक्रबार दिल्लीमा प्रधानमन्त्री मोदीसँग २३औं भारत–रुस वार्षिक शिखर सम्मेलनमा सहभागी हुनेछन् ।
राष्ट्रपति पुटिनको भारत आउनुअगाडि नै रुसी मन्त्रीहरू दिल्ली आइपुगेका थिए । जसमा रुसी उपप्रधानमन्त्री डेनिस मान्टुरोभ र रक्षामन्त्री सर्गेई सोइगुलगायत रहेका छन् । पुटिनको भ्रमणका क्रममा दिल्लीमा सुरक्षा व्यवस्थामा कडाइ गरिएको छ ।
विश्व राजनीतिमा द्रुत परिवर्तन आइरहेका बेला रुसी राष्ट्रपति पुटिनको भारत भ्रमण भएको हो । यसकारण यसलाई अर्थपूर्ण रूपमा हेरिएको छ ।
युक्रेनसँगको युद्ध, पश्चिमी देशहरूसँग रुसको बढ्दो तनावका बेला रुसी राष्ट्रपति पुटिनले भारत भ्रमण गरेका हुन् ।
पुटिनलाई स्वागत गर्न पाउँदा खुसी भएको भनेर भारतीय प्रधानमन्त्रीले सामाजिक सञ्जालमा लेखेका छन् । आफूले रुसी राष्ट्रपतिलाई स्वागत गर्न पाउँदा खुसी भएको उल्लेख गर्दै उनले पुटिनको भ्रमणका क्रममा हुने बैठकहरूको प्रतीक्षामा रहेको समेत बताएका छन् ।
पुटिनको भ्रमणका क्रममा भारतीय अन्य पार्टीहरूले समेत भेट चाहेका छन् । प्रतिपक्षी दल कांग्रेसका राहुल गान्धीले विदेशी प्रतिनिधिमण्डलसँग विपक्षी दलहरूले समेत भेट पाउनुपर्ने तर भारतीय सत्तापक्ष नै तयार नरहेको आरोप लगाएका छन् ।
.jpg)
