काठमाडौंः लिबियाका सेना प्रमुख लेफ्टिनेन्ट जनरल मोहम्मद अलि अहमद अल–हद्दादसहित चार जना उच्च सैनिक अधिकारीहरूकाे टर्कीको राजधानी अंकारा नजिकै भएको विमान दुर्घटनामा निधन भएको छ । लिबियाका प्रधानमन्त्री अब्दुल हमिद द्बेइबाहले यो घटनाको पुष्टि गर्दै यसलाई राष्ट्रका लागि ठूलो क्षति भएको बताएका छन् ।

टर्कीका गृहमन्त्री अली येरलिकायाकाअनुसार फाल्कन ५० प्रकारको व्यावसायिक जेट विमान (टेल नम्बर ९ एच–डीएफजे) अंकाराको एसिनबोगा विमानस्थलबाट स्थानीय समयअनुसार साँझ ८ः१० बजे त्रिपोलीका लागि उडेको थियो । उडानको केही समयपछि नै चालक दलले हायमाना क्षेत्र नजिकै आपत्कालीन अवतरणको अनुरोध गरेको थियो । तर साँझ ८ः५२ बजेपछि विमानसँग सम्पर्क टुटेको थियो । टर्कीका सुरक्षा फौजले अंकाराको हायमाना जिल्लास्थित केसिककावाक गाउँ नजिकै विमानको भग्नावशेष फेला पारेका थिए। प्रारम्भिक अनुसन्धानमा विद्युतीय खराबी (इलेक्ट्रिकल फेलियर) कारण दुर्घटना भएको देखिएको छ र तोडफोडको सम्भावना नरहेको टर्की अधिकारीहरूले बताएका छन् ।

अल–हद्दाद टर्कीमा उच्चस्तरीय सैनिक वार्ताका लागि गएका थिए । मङ्गलवार नै उनले टर्कीका रक्षा मन्त्री यासार गुलेर र टर्कीका सेना प्रमुख सेल्चुक बायराक्तारोग्लुसँग भेटघाट गरेका थिए । दुवै देशबीच सैनिक तथा सुरक्षा सहकार्यलाई मजबुत बनाउने उद्देश्यले यो भ्रमण भएको थियो । निधन हुने अन्य अधिकारीहरूमा स्थल सेनाका प्रमुख मेजर जनरल अल–फितौरी घ्रिबेल, सैनिक उत्पादन प्राधिकरणका निर्देशक ब्रिगेडियर जनरल महमुद अल–कताउइ, सेना प्रमुखका सल्लाहकार मोहम्मद अल–असावी दियाब र सेना प्रमुखको मिडिया कार्यालयका फोटोग्राफर मोहम्मद ओमार अहमद महजुब रहेका छन् ।

विमानमा तीन जना चालक दलका सदस्यहरू पनि थिए र सबैको निधन भएको अनुमान गरिएको छ । प्रधानमन्त्री द्बेइबाहले घटनाको पूर्ण छानबिन गर्ने र टर्कीमा एक प्रतिनिधिमण्डल पठाउने बताएका छन् । लिबियाको राष्ट्रिय एकता सरकारले तीन दिनको राष्ट्रिय शोक घोषणा गरेको छ । यो घटनाले लिबियाको सैनिक नेतृत्वमा ठूलो क्षति पुगेको छ । अल–हद्दाद सन् २०२० देखि लिबियाको सेना प्रमुखको रूपमा नियुक्त भएका थिए र देशको स्थिरताका लागि महत्वपूर्ण भूमिका निर्वाह गर्दै आएका थिए ।