काठमाडौं : निर्वाचन आयोगको आयुक्तमा प्रस्तावित कृष्णमान प्रधान आफ्नो नाम फिर्ता लिएका छन् ।
संसदीय सुनुवाइ समितिबाट अस्वीकृत हुने भएपछि प्रधानले नाम फिर्ता लिएको भन्दै संसदीय समितिमा निवेदन दिएका हुन् ।
गत असार २ गते बसेको संवैधानिक परिषद्को बैठकले प्रधानलाई निर्वाचन आयुक्तमा नियुक्त गर्न सिफारिस गरेको थियो । उनको संसदीय समितिले सुनुवाइ गरिसकेको छ ।
प्रधानबारे निर्णय गर्न सोमबार बिहान ११ बजे बोलाइएको समितिको बैठक दलहरु आन्तरिक छलफलमा रहेकाले ५ बजेका लागि सारिएको थियो ।
प्रधानलाई यौन दुर्व्यहारको आरोप लागेको छ । संवैधानिक निकायमा जिम्मेवारी पाउने व्यक्ति उच्च नैतिक चरित्रको हुनुपर्ने संवैधानिक व्यवस्था छ ।
