स्थानीय चुनाव भएको तीन दिन बितिसक्यो । तर अधिकांश स्थानीय तहको गणना प्रारम्भिक चरणमै छ । चार दर्जन स्थानीय तहको पनि अन्तिम नतिजा आउन सकेको छैन । जबकी केही स्थानीय तहमा निर्विरोध नतिजा आएको थियो । थोरै मतदान भएका स्थानीय तहको समेत नतिजा सार्वजनिक हुन सकेको छैन । अहिलेकै गति कायम रहने हो भने ठूला शहरहरुको नतिजा आउन कयौ दिन लाग्ने अनुमान गरिदैछ । महानगरहरुको गणना अझ सुस्त छ । उम्मेद्वार संख्या धेरै हुनु र गणना संख्या थोरै हुनुले विलम्ब भइरहेको छ । राजधानी उपत्यका रहेको काठमाडौं महानगरपालिकामा दुई वटा वडाको पनि नतिजा टुंगिएको छैन । शुक्रबार मतदान भएको काठमाडौंमा आइतबार मात्रै वडा नम्बर एकको नतिजा अन्तिम आएको छ । ३२ वटै वडाको गणना सकिने कति समय लाग्छ भन्ने एकिन छैन ।
राजधानीका अर्का महानगर ललितपुर सहित अन्य नगरपालिका र गाउँपालिकाको गणना अत्यन्तै ढिलो भइरहेको छ । उपत्यका बाहिरको नतिजा पनि आउन पनि उत्तिकै समय लाग्ने देखिन्छ । कतिपय स्थानीय तहको गणनाका क्रममा विवाद भएर ढिलाइ भइरहेको छ भने कतिपयमा मत गणना संख्या नै अति कम छ । यस्तो समस्या यसअघिका निर्वाचनमा पनि देखिने गरेको थियो । तर त्यसमा सुधार नगरिएको तथ्य यसपटक पनि देखिएको छ । कतिपय स्थानीय तहमा भने निर्वाचन नै रोकिएको छ । निर्वाचन रोकिएका ठाउँहरुमा फेरि निर्वाचन हुँदैछ ।
जबकी आगामी ६ जेठदेखि वर्तमान जनप्रतिनिधिहरु रिक्त हुँदैछन् । निर्वाचन आयोगले ३० वैशाखमा स्थानीय चुनावको मिति घोषणा गर्दै संविधानको यो व्यवस्था पालना हुने जनाएको पनि थियो । तर त्यसअनुसार गणनाको व्यवस्था भने गर्न सकेको देखिएन । यदि जनप्रतिनिधि रिक्त नहुनेगरी गणना गर्ने व्यवस्था भएको भए अहिलेको गतिमा नतिजा रोकिने थिएन । अर्कातिर स्वयम् दलहरुकै कारण पनि गणनामा ढिलाइ भइरहेको छ । एकापसमा विश्वास नहुँदा दलहरुले गणनाका क्रममा विवाद गरिरहेका छन् । त्यो अनावश्यक विवादको परिणाम गणनामा ढिलाइ हुनु हो । यसले आम चासोलाई लम्ब्याउने मात्रै गरिरहेको छैन, ढिलो गणना गर्नु मुलुकको परिचय हो भन्ने समेत स्थापित गर्न बल पुगिरहेको छ । तसर्थ अहिलेको गणनामा सुधार जरुरी छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies