मनोज कुमार साह/मध्यान्ह
रौतहट : स्थानीय तहमा अनियमितता हुने संख्या अधिक रहेको महालेखापरीक्षकको कार्यालयको प्रतिवेदनसहित विभिन्न अध्ययन प्रतिवेदनले देखाएका छन् । अनियमितताको प्रकृति भने फरक–फरक रहेको पाइन्छ ।
रौतहटको कटहरिया र फतुवा बिजयपुर नगरपालिकामा कामै नगरी भुक्तानी दिलाउने कार्य भएका दाबी स्थानीयले गरेका छन् ।
रौतहटको कटहरिया नगरपालिका र फतुवा बिजयपुर नगरपालिकामा प्रमुख प्रशासकिय अधिकृत र लेखापालको मिलोमत्तो रहेको आशंका स्थानीयको छ ।
कटहरिया नगरपालिकामा औषधि खरिद गर्न ७० लाख रुपैयाँ भुक्तानी भएको छ । कतिपयल यसमै आशंका गरेका छन् । गत असार महिनामा नगरपालिकाले औषधि खरिदको सबै प्रक्रिया पूरा गरी भुक्तानी दिइसकेको छ ।
कटहरिया नगरपालिका वाड नं. ४ का वडाध्यक्ष चन्दन कुशवाहालाई औषधि खरिदको भुक्तानी दिइएको हो । प्रमुख प्रशासकीय अधिकृत सुरेन्द्रमान प्रधानले औषधि खरिद गरी भुक्तानी दिइसकेको र औषधि जिन्सी शाखामा राखिएको बताएका छन् ।
नगरपालिकाका स्वास्थ्य शाखा प्रमुख शंकर राय यादव औषधि खरिदबारे कुनै जानकारी नरहेको बताउँछन् ।
यादव भन्छन्, ‘औषधि खरिदबारे मलाई कुनै जानकारी छैन तर फाइल रुजु गर्न दबाब आइरहेको छ ।’
जिन्सी शाखा प्रमुख सन्तोष साहले स्वास्थ्य शाखा प्रमुख यादवलाई फाइलमा हस्ताक्षर गर्न, जिन्सी शाखाबाट औषधि बुझेको भरपाइमा हस्ताक्षर आग्रह गरेको बताइन्छ ।
निलम्बित नगरप्रमुख अजयप्रकाश निकटका मानिसहरूले स्वास्थ्य शाखाप्रमुखलाई ७० लाखको औषधि खरिदको सम्पूर्ण प्रक्रिया मिलाउन भनेका छन् ।
निलम्बित नगरप्रमुखले नै साहलाई जिन्सी शाखा प्रमुखको जिम्मेवारी दिएका थिए ।
जिन्सी प्रमुख साह औषधि खरिद भएको, भुक्तानी दिइएको र औषधि स्वास्थ्यचौकीलाई वितरण गरिएको तथा केही गोदाममै रहेको बताए पनि कुन खरिदकर्तालाई भुक्तानी दिइएको हो भन्ने कुरा आफूलाई थाहा नभएको बताउँछन् ।
रौहतटका अन्य पालिकाहरुमा पनि यस्तो आशंका रहेको स्थानीयहरु बताउँछन् ।
