उदयपुर : उदयपुरमा किशोरी तथा महिलामाथि हुने डिजिटल तथा अनलाइन हिंसा न्यूनीकरण गर्ने उद्देश्यले ‘डिजिटल सुरक्षा अभियान’ कार्यक्रमको शुभारम्भ गरिएको छ ।
महिला सशक्तीकरण स्रोत केन्द्र, उदयपुर युवा महिला सञ्जाल र जिल्ला प्रहरी कार्यालय उदयपुरको सहकार्य तथा ओरेकलगायत विभिन्न संस्थाको सहयोगमा सामुदायिक रेडियो उदयपुरको १८औँ वार्षिकोत्सवको अवसर पारेर कार्यक्रम सुरु गरिएको हो ।
प्रदेशसभा सदस्य तथा उपसभामुख सिर्जना दनुवारलगायत अतिथिहरूले संयुक्त रूपमा पानसमा दीप प्रज्वलन गरी कार्यक्रम उद्घाटन गरेका थिए ।
कार्यक्रममा बोल्दै उपसभामुख दनुवारले डिजिटल प्रविधिको प्रयोग दैनिक जीवनको अभिन्न हिस्सा बन्दै गइरहेको उल्लेख गर्दै यसको सुरक्षित प्रयोगमा विशेष ध्यान दिन आवश्यक रहेको बताइन् । उनले सामाजिक सञ्जाल, बैंकिङ सेवा तथा अन्य विभिन्न कार्यमा डिजिटल माध्यमको प्रयोग बढ्दो क्रममा रहेकाले प्रयोगकर्ताहरू सचेत र सुरक्षित हुनुपर्नेमा जोड दिइन् ।
उनले डिजिटल तथा प्रविधिको दुरुपयोग नभई सही ढंगले सदुपयोग गर्न सके यसले समाज र व्यक्तिको विकासमा महत्वपूर्ण योगदान पुर्याउने धारणा राखिन् ।
नेपाल पत्रकार महासंघ उदयपुरका अध्यक्ष भक्तिबिलाश पोखरेलले डिजिटल माध्यमको प्रयोगमा अनुशासन, मर्यादा र जिम्मेवारी आवश्यक रहेको बताउँदै यसको दुरुपयोगबाट बच्न सबै पक्ष सचेत हुनुपर्ने बताए ।
कार्यक्रममा विभिन्न संघसंस्थाका प्रतिनिधि, बालबालिका, किशोरकिशोरी तथा युवायुवतीहरूको उल्लेखनीय सहभागिता रहेको थियो । कार्यक्रममा महिला डिजिटल हिंसासम्बन्धी जनचेतना फैलाउने उद्देश्यले गीत, नाटक र कथामार्फत सांस्कृतिक प्रस्तुति समेत गरिएको थियो ।
.jpg)
