काठमाडौं : डडेल्धुराका विनय प्रकाश मल्लले राष्ट्रिय महिला भलिबल टोलीकी सदस्य कविता भट्टलाई ५० हजार रुपैयाँ सम्मान स्वरुप प्रदान गर्ने भएका छन् । मल्लको जन्मघर डडेल्धुरा भए पनि उनी हाल जापानमा बस्दै आएका छन् ।
डडेल्धुरा स्थायी घर भएका समाजसेवी मल्लले सामाजिक सञ्जालमार्फत डडेल्धुरा गन्यापधुरा गाउँपालिका वडा नं. १ निवासी राष्ट्रिय भलिबल खेलाडी कवितालाई सम्मान स्वरुप ५० हजार रुपैयाँ प्रदान गर्ने घोषणा गरेका हुन् ।
भलिबलमार्फत डडेल्धुराको नाम राष्ट्रिय तथा अन्तर्राष्ट्रिय स्तरसम्म चिनाउन अहम् भूमिका निभाएको बताउँदै उनले कविताप्रति आभार प्रकट गरेका छन् ।
१९औं एसियन गेममा पनि सहभागी भइसकेकी कविता हालैमात्र काठमाडौंमा सम्पन्न काभा महिला भलिबल लिगमा पनि सहभागी भएकी थिइन् । उक्त प्रतियोगितामा नेपाल फाइनलमा भारतसँग पराजित हुँदै उपविजेतामा सीमित भएको थियो ।
