झापा : झापाकाे भद्रपुर- १० चन्द्रगढीमा शङ्खध्वनि प्रतियोगिता सम्पन्न भएकाे छ । डाइनामिक ग्रुप नेपालले आयाेजना गरेकाे खुला शङ्खध्वनि प्रतियोगितामा प्रतियाेगी सहभागीहरूमा महिला र पुरुषबीच छुट्टाछुट्टै प्रतिस्पर्धा गराइएको थियाे ।
वैदिककालदेखि बजाइँदै आएको बाजा शङ्खले मान्छेको शारीरिक, मानसिक स्वास्थ्य तथा पर्यावरणीय क्षेत्रमा खेल्ने सकारात्मक भूमिका र प्रभावको महत्त्व नयाँ पुस्तासम्म पुर्याउने उद्देश्यले आयोजना गरिएको ग्रुपकी अध्यक्ष खगिन्द्रा खुसीले जानकारी दिइन् ।
कार्यक्रममा महिलातर्फ अप्सरा पराजुली प्रथम, लक्ष्मी कोइराला द्वितीय तथा टीकाकुमारी तिम्सिना तृतीय भएका थिए भने पुरुषतर्फ दीपेन्द्र खतिवडा प्रथम, राजन न्यौपाने द्वितीय तथा गणेश पौडेल तृतीय भएका थिए । महिला तथा पुरुष प्रतियोगीहरूका प्रथम, द्वितीय र तृतीयलाई क्रमशः ३ हजार, २ हजार र १ हजार रुपैयाँ नगद राशिसहित प्रमाणपत्र प्रदान गरिएको थियो ।
धरानदेखि आएका आचार्य दीपक पराजुली,आचार्य विष्णुदेव र पं. रघुनाथ रिमाल निर्णायकमा रहेको सो कार्यक्रममा पं. रघुनाथ रिमालले पाठेघरमा समस्या हुनसक्ने भएको कारण महिलालाई शङ्ख बजाउन नहुने कुरा उल्लेख गरे भने महिलाले शङ्ख बजाउने उपयुक्त मुद्राका विषयमा समेत जानकारी दिए । आचार्य दीपक पराजुलीले भने शास्त्रमा महिलाले शङ्ख बजाउने कुरालाई बर्जित नै गरिएको कुरा उल्लेख गर्दै शास्त्रलाई प्रश्न गर्न नमिल्ने भए पनि आयोजना गरिसकेपछि उद्देश्यअनुसार कार्यक्रम सम्पन्न गर्नुपर्छ भन्ने धारणा व्यक्त गरेका थिए ।
कार्यक्रमकी अध्यक्ष खुसीले १० वर्षदेखि सङ्घर्ष गर्दै आएको डाइनामिक ग्रुपका संघर्षका कथा सुनाउँदै विस्तारै स्वावलम्बनको बाटोमा लाग्दै गरेको पनि जानकारी गराइन् ।
कार्यक्रमको प्रायोजनसमेत गरेकोे ओम साई पाथिभरा हस्पिटलका निर्देशक तथा कार्यक्रमका प्रमुख अतिथि बालकुमार पोख्रेलले शङ्खध्वनि आफैंमा महत्त्वपूर्ण कार्य हो भन्दै यस्तो राम्रो कार्यक्रमको आयोजना गर्ने डाइनामिक ग्रुपको पहिलो कार्यक्रम नै यति राम्रो भएको कारण अर्को वर्ष हुने यस कार्यक्रमको दोस्रो शृङ्खलालाई पनि ओम साई पाथिभरा हस्पिटलले नै प्रायोजन गर्ने प्रतिबद्धता व्यक्त गरे ।
साथै, उनले ओम साई पाथिभरा हस्पिटलले ७० वर्ष पूूरा भएका नागरिकहरूलाई विशेष छुट तथा नि:शुल्क सेवा प्रदान गर्ने जानकारी गराए ।
ओम साई पाथीभरा हस्पिटल प्रा. लि.का निर्देशक बालकुमार पोख्रेलको प्रमुख आतिथ्य रहेको कार्यक्रम संस्थाकी सचिव रश्मि असफल तथा कार्यक्रमका संयोजक पिताम्बर अधिकारीले सञ्चालन गरेका थिए ।
.jpg)
