काठमाडौं : चर्च ब्वाइज युनाइटेड एएफसी च्यालेन्ज कपअन्तर्गत प्रारम्भिक छनोटबाटै बाहिरिएको छ ।
त्रिपुरेश्वरस्थित दशरथ रंगशालामा बुधबार सम्पन्न खेलमा पारो एफसीसँग २-१ गोलअन्तरले पराजित हुँदै चर्च ब्वाइज छनोटबाट बाहिरिएको हो ।
लकेन लिमणबुको गोलमा चर्च ब्वाइजले शुरुवाती अग्रता लिएको थियो । तर किङ्गा वाङ्चुक र विलियम ओपोकुको गोलमा पारो एफसीले पुनरागमन गर्दै जित निकालेको हो ।
३९औं मिनेटमा लाकेन लिम्बूले चर्च ब्वाइजलाई शुरुवाती अग्रता दिलाए । मोसेस टुमले मिलाइदिएको पासमा उनले गोल लाइननजिकबाट गरेको प्रहार गोलमा परिणत भयो ।
एक मिनेटपनि नबित्दै किङ्गा वाङ्चुङले गोल गर्दै खेल बराबरीमा ल्याए । त्यसपछि खेलको पहिलो हाफ १–१ को बराबरीमा सकिएको थियो । खेलको ६७औं मिनेटमा विलियन ओपुकुले गोल गर्दै पारोलाई २-१ गोलअन्तरको जित दिलाए ।
