आमनिर्वाचन–२०७९ को नतिजा सार्वजनिक हुने क्रम अन्तिम चरणमा पुगेको छ । विवादका कारणले रोकिएका निर्वाचन क्षेत्रहरुको समेत गणना सकिन लागेकाले अब सबैको ध्यान समानुपातिकतर्फ जानेछ । समानुपातिक तर्फ प्रतिनिधिसभामा ११० सिटको छिनोफानो हुनेछ । उक्त सिट संख्या कुल सदर मतको तीन प्रतिशत मत कटाउने दलहरुबीच बाँडफाँड हुनेछ । यसपटक सात दलले राष्ट्रिय मान्यता पाउने निश्चित भएकाले उनीहरुबीच मतका आधारमा समानुपातिक तर्फको सिट बाँडिदैछ । समानुपातिक सिट पाउने दलहरुले प्रत्यक्षतर्फ एक सिट भन्दा बढी जितेकाले सातै दल राष्ट्रिय दल बन्दैछन् । यसपटक राष्ट्रिय प्रजातन्त्र पार्टी (राप्रपा) ले फेरि राष्ट्रिय दलको मान्यता पाउँदैछ । राष्ट्रिय स्वतन्त्र पार्टी (रास्वपा) र जनमत पार्टी पहिलोपटक चुनावमा भाग लिदै राष्ट्रिय दल बन्दैछन् ।
चुनावको प्रमुख चासोको विषय नै यी तीन दलले राष्ट्रिय दलको हैसियत पाउनु हो । रवि लामिछाने नेतृत्वको रास्वपा र सिके राउत नेतृत्वको जनमत पार्टीले गठन भएको छोटो अवधिमै राष्ट्रिय दलको मान्यता पाएको छ । तर पुराना र ठूला दलले यसपटक क्षति बेहोर्नु परेको छ । नेपाली कांग्रेस, नेकपा एमाले, नेकपा माओवादी केन्द्र र जनता समाजवादी पार्टी (जसपा) ले पाएको समानुपातिक तर्फको मत अघिल्लो चुनाव भन्दा थोरै हो । लोकतान्त्रिक समाजवादी पार्टी (लोसपा) ले यसपटक राष्ट्रिय दलको मान्यता नपाउने निश्चित छ । अर्को दल नेकपा एकीकृत समाजवादीले पनि तीन प्रतिशतको थ्रेसहोल्ड कटाउने संभावना न्यून छ । यी दुवै दलको नेतृत्व राष्ट्रिय राजनीतिमै महत्वपूर्ण अर्थ र भूमिका भएका नेता छन् । तर यसपटक दलको मान्यता पाउने अवस्था रहेन ।
प्रत्यक्षतर्फ समेत नयाँ र स्वतन्त्र उम्मद्वारहरुको आकर्षण देखिनुले पुराना शक्तिहरुप्रति मतदाता सन्तुष्ट नरहेकै प्रमाणित हुन्छ । कांग्रेसले अघिल्लो चुनाव भन्दा प्रत्यक्षतर्फ सिट संख्या बढाए पनि बाँकी दलहरुले कम जितेका छन् । शहरी र शिक्षित जनसंख्या भएको राजधानी उपत्यकामै पुराना दलहरुले ठूलै क्षति बेहोर्नु परेको छ । बहालवाला मन्त्रीलाई नै हराएर नयाँ अनुहार अनुमोदित हुनुको प्रष्ट सन्देश हो, पुराना दलहरुले सच्चिनुको विकल्प छैन । त्यो सच्चिने पहिलो अवसर समानुपातिक तर्फको सांसद चयन हुन सक्छ । किनकि ठूला दलहरुले प्रत्यक्षतर्फ समावेशी उम्मेद्वार चयन गरेका थिएनन् । त्यसलाई सच्याएर दलहरुले सुध्रिन तयार रहेको सन्देश दिन सक्छन् । किनकि यो संविधानले समावेशी लोकतन्त्रको कल्पना गरेको छ, तर दलहरुले बाध्यात्मक अवस्था नरहेसम्म पालना गर्न चाहिरहेको देखिदैन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies