दोहा, कतार : धनकुटा सेवा समाज कतारले 'चेलीबेटी भेटघाट' कार्यक्रम गर्ने भएको छ । नेपाली महिलाहरुको महान् पर्व हरितालिका तिजको अवसर पारेर 'आन्तरिक तिज तथा चेलीबेटी भेटघाट कार्यक्रम २०२४'को आयोजना गर्न लागिएको समाजले जनाएको छ ।
शुक्रबार ग्रान्ड मलमा रहेको वेलफेयर रेस्टुरेन्टमा बिहान ११ः३० बजेबाट शुरु हुने कार्यक्रममा कतारमा रहेका सबै धनकुटेहरुलाई उपस्थितिका लागी समाजले आग्रह गरेको छ । समाजले प्रत्येक वर्ष तिज कार्यक्रमको आयोजना गर्दै आएको र यो वर्ष पनि निरन्तरता दिँदै प्रवासमा रहेका चेलीबेटीहरूको सम्मानमा उक्त कार्यक्रमको आयोजना गरिएको समाजका अध्यक्ष तिल विक्रम मगरले बताए ।
'धनकुटा सेवा समाजको चाहना, शुद्ध सामाजिक भावना' भन्ने मूल नारा लिएर सन् २००४ मा स्थापना गरिएको समाज कतारमा एक अग्रणी सामाजिक संस्थाका रूपमा परिचित छ ।
