कास्की : नेपाल कम्युनिष्ट पार्टी (माओवादी केन्द्र) को विद्यार्थी संघठन अनेरास्ववियु (क्रान्तिकारी) गण्डकी प्रदेशको अध्यक्षमा त्रिदिप गुरुङ निर्वाचित भएका छन् ।

यही भदौ २३ गतेदेखि पोखरामा सुरु भएको दोस्रो प्रदेश सम्मेलनमा नयाँ नेतृत्व चयनका लागि भएको मतदानको आज बिहान सार्वजनिक मतपरिणामअनुसार गुरुङ एक सय ३७ मतसहित विजयी भएका हुन् ।

उनका प्रत्याशी रामकृष्ण भट्टले ७१ मत ल्याएका थिए । खुला उपाध्यक्षमा वसन्त भट्टचन (कास्की) सरोजवल्लभ भट्टराई (गोरखा), अशोक मरहट्ठा (गोरखा) विजयी भएका हुन् । यसैगरी समावेशी उपाध्यक्षमा कुलबहादुर बुढा (बागलुङ) र महिला उपाध्यक्षमा सीता बराल (तनहुँ) निर्विरोध भएका छन् ।

प्रमुख सचिवमा सुजन बाँस्तोला (कास्की) तथा सचिवमा खुलातर्फ प्रदीप ढकाल (गोरखा) विशद उपाध्याय (नवलपुर) र सन्दीप महतो (नवलपुर) निर्वाचित भए । महिला सचिवमा जुना गुरुङ (लमजुङ) समावेशीमा दुर्गा विक (लमजुङ) र कोषाध्यक्षमा अनिल सुनार (बागलुङ) निर्विरोध भएको निर्वाचन समितिका संयोजक अधिवक्ता निर्मला क्रान्तिले जानकारी दिए । क्रान्तिकारीको प्रदेश समिति ७५ सदस्सीय रहेको छ ।

सम्मेलनले ६५ सदस्य निर्वाचित गरेको र बाँकी १० जना मनोनीत गरिने निर्वतमान अध्यक्ष सुदिन पौडेलले जानकारी दिए । निर्वाचन समिति सदस्यमा विपिन आचार्य र अमरदिप पराजुली रहेका थिए ।