काठमाडौं : अवैधानिक कामदारहरुको घर फिर्ताका लागि मलेसियाले शुरु गरेको ‘व्याक फर गुड’ कार्यक्रम अन्तर्गत हालसम्म एक सय जनाभन्दा बढी नेपाली कामदार घर फर्किएका छन् । मलेसियास्थित नेपाली दूतावासका अनुसार गत हप्ता ८१ जना र त्यस भन्दा अघिल्लो हप्ता २० जना गरी एक सय एक जना अवैध नेपाली घर फर्किएको बताएको छ ।
अगस्ट १४ तारीखमा पुत्राजयबाट ५२ जना र सेरेम्बान अध्यागमनबाट २९ जना गरी ८१ नेपालीहरु एकतर्फी ट्राभल्स डकुमेन्ट बनाएर घर फर्किएका हुन् । मलेसिया सरकारले गत अगष्ट १ तारिखदेखि लागू हुने गरी ‘व्याक फर गुड’ कार्यक्रम सुरु गरेको हो । उक्त कार्यक्रम अन्तर्गत सात सय रिंगिट (करिब २० हजार रुपैयाँ) जरिवाना र करीव पाँच हजार शुल्क तिरेपछि अवैधानिक कामदारलाई स्वदेश फर्किन दिइने व्यवस्था गरेको छ । आममाफीको समय अगष्ट १ देखि डिसेम्बर ३१ सम्म चार महिना रहेको छ ।
दूतावासले आफ्नो पहलमा सात सय जरिवाना र पाँच हजार शुल्कमा घर फर्किन पाएपनि केही अवैध कामदार २२ सय रिंगिट खर्च गरेको पाइएको भन्दै त्यसको छानवीन गर्ने बताएको छ ।
नेपाली राजदूतावासले सम्पर्कमा आई जरीवाना तथा शुल्क तिर्ने कामदारलाई सरकारी सवारी साधनबाट विमानस्थल पुर्याउने गरेको छ । उक्त कार्यक्रमबाट मलेसियामा भिसा अवधिभन्दा धेरै बसेर ओभरस्टे भएका, कागजपत्रबिहीन वा अन्य कारणले अवैधानिक हुन पुगेका सबै विदेशी नागरिकलाई लाभ हुने अपेक्षा गरिएको मलेसियाका सञ्चारमाध्यमहरुले बताएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies