बर्दिया : बर्दियाको गेरुवा गाउँपालिका अन्तर्गतका विद्यालयहरूमा महिनावारी हुँदा बालिकाहरूले कक्षा छाड्ने क्रम बन्द भएको पाइएको छ ।
जिल्ला तथा पालिका स्तरीय सरोकारवालाहरूले गरेको विद्यालय अनुगमनका क्रममा यस्तो पाइएको हो । अनुगमनका क्रममा विद्यालयमा बालबालिकाहरू अनुशासित भइ सिकाइ क्रियाकलापमा सक्रिय सहभागिता जनाउने र खुलेर आफ्ना समस्या राख्ने गरेको समेत पाइएको छ ।
प्लान इन्टरनेशनल र भेरी वातावरणीय विशिष्टता समुह (बि ग्रुप) को साझेदारीमा सञ्चालित बालविवाह न्यूनीकरण परियोजना सञ्चालित विद्यालयहरूमा यस्तो पाइएको हो । परियोजनाले गेरुवा गाउँपालिकाका माध्यामिक र आधारभूत गरी ९ वटा विद्यालय समेटेको छ ।
परियोजनामार्फत ति विद्यालयहरूमा शिक्षकहरूको क्षमता विकास कार्यशाला (सुरक्षित विद्यालय, समावेशी विद्यालय, महिनावारी व्यवस्थापन, खानेपानी सरसफाइ, बृहत् सुरक्षा सम्बन्धी तालिम महिनावारी आराम कक्षा सहयोग, विपन्न बालबालिकाहरूका लागि सामग्री सहयोग, सिकाइ उपलब्धी कमजोर भएका बालबालिकाहरूका लागि उपचारात्मक कक्षाहरू सञ्चालन जस्ता क्रियाकलापहरु गरिएको थियो ।
विगतमा वर्षहरूमा विद्यालयमा बालिकाहरू महिनावारी हुँदा घरमा जाने भाग्ने र कक्षा छाड्नेको संख्या धेरै थियो । अहिले विद्यालयमा महिनावारी कक्ष निर्माण भएपछि बालिकाकाहरुले कक्षा छाड्ने दर बन्द भएको सरस्वती आधारभूत विद्यालय बिन्द्राका प्रधानाध्यापक योगेन्द्र प्रसाद चौधरीले जानकारी दिए ।
उनले सिकाइ उपलब्धी कमजोर भएका बालबालिकाहरूको उपचारात्मक कक्षाले सिकाइ उपलब्धी बढाउनका लागि धेरै मद्दत्त पुगेको बताउँदै परियोजनाका कारण विद्यालयमा बालमैत्री वातावरण निर्माण गर्नका लागि शिक्षकको सिकाइ क्रियाकलापमा परिर्वतन आएको बताए ।
परियोजनाले गुणस्तरीय शिक्षाका लागि ठूलो टेवा पु¥याएको बताउँदै सरस्वती आधारभूत विद्यालय जोधिपुरका प्रधानाध्यापक नारायण प्रसाद शर्माले परियोजना सञ्चालन भएपछि बालबालिकाहरूले उमेर नपुगी गर्ने बालविवाहको जोखिम कम गर्दै भाग्ने दरमा पनि कमी आएको बताए ।
परियोजनाले समेटेका विद्यालयहरूमा विद्यार्थीहरूको सिकाइ उपलब्धी बढाउन विद्यालय आचार संहिता निर्माण गरिएको र त्यसलाई पालना गर्न गराउन बेला बेलामा अन्तक्रिया गर्ने गरिएको, विद्यालयमा गुनासो सुनवाइका लागि सुझाव पेटीका राखी प्राप्त हुने गुनासाहरूलाई सम्बोधन गर्न समिति निर्माण गरी गुनासाहरूलाई सम्बोधन गर्ने प्रयास गरिएको र घरमा सिकाइ निर्माणका लागि अभिप्रेरित गर्ने गरिएको पाइएको छ ।
अनुगमनका क्रममा जिल्ला शिक्षा समन्वय इकाईका प्रमुख सूर्य बहादुर खत्रीले परियोजनामार्फत आर्जन भएका ज्ञान र सीपको प्रयोगलाई व्यवहारमा निरन्तरता दिँदै परिणाम ल्याउन सकिने किसिमले अगाडि बढ्न शिक्षकहरूलाई आग्रह गरे ।
गेरुवा गाउँपालिका अध्यक्ष जमान सिंह के .सी.ले परियोजनाले शैक्षिक गुणस्तर वृद्धि गर्न गाउँपालिकालाई सहयोग गरेकोमा धन्यवाद व्यक्त गर्दै परियोजनालाई क्रमशः बाँकी अन्य विद्यालयहरुमा लैजान आग्रह गरे ।
अनुगमनमा गाउँपालिका अध्यक्ष जमान सिंह के.सी., उपाध्यक्ष लक्ष्मीकुमारी चौधरी, जिल्ला शिक्षा समन्वय इकाई बर्दियाका इकाई प्रमुख सूर्य बहादुर खत्री, शाखा अधिकृत शेर बहादुर रोका गेरुवा गाउँपालिका शिक्षा शाखा प्रमुख नवराज अधिकारी, परियोजना सम्बद्ध संस्थाका पदाधिकारी तथा कर्मचारी लगायत सञ्चारकर्मीहरुको सहभागिता थियो ।
