काठमाडौं : नेपाल वैदेशिक रोजगार व्यवसायी संघको आगामी निर्वाचनका लागि सत्तारुढ दल नेपाल कम्युनिष्ट पार्टी (नेकपा) निकट प्रगतिशिल वैदेशिक रोजगार मञ्च नेपाल र नेपाल वैदेशिक रोजगार व्यवसायी गणतान्त्रिक मञ्चका तर्फबाट सरोज कुमार पोखरेल अध्यक्षका उम्मेद्वार बन्ने भएका छन् । पार्टी प्रतिनिधि सहित बुधबार बसेको मञ्चद्वयको संयुक्त बैठकबाट पोखरेलको नेतृत्वमा निर्वाचनमा जाने निर्णय भएको बताइएको छ । हाल सघंको महासचिव समेत रहेका पोखरेल मञ्चको संस्थापक अध्यक्ष हुन् ।
मञ्चद्वयका तर्फबाट मञ्चका संस्थापक एवं संघका महासचिव पोखरेल र गणतान्त्रिक मञ्चका पूर्व अध्यक्ष एवं संघका प्रथम उपाध्यक्ष राम प्रसाद भान्तनाका बीचमा को अध्यक्षको उम्मेदवार बन्ने ? भन्ने विषयमा निकै कडा प्रतिश्पर्धा चलेको थियो । बैठकले निर्णय गर्नुअघि सञ्चारकर्मी बीच आफु मुल्य मान्यताका पक्षमा निरन्तर लडेको र संघको प्रथम उपाध्यक्ष भएका कारण एक जना प्रस्तावक र एक जना समर्थक भए व्यवसायीका बीचमा अध्यक्षको उम्मेदवार बन्ने प्रतिक्रिया दिएका थिए ।
तर, निर्णय भएपछि प्रतिक्रियाका लागि मध्यान्ह दैनिकको निरन्तरको सम्पर्कको प्रयास सफल भएन । एक शुत्रले बताए अनुसार तोकिएका उम्मेदवारविरुद्ध वागी दिए पार्टीबाट कडा कारबाही गरिने बताइएको छ । मञ्चका पूर्व अध्यक्ष समेत रहेका संघका पूर्व द्वितीय उपाध्यक्ष हरि बहादुर पाण्डे क्षेत्री पनि अध्यक्षका आकांक्षी थिए तर उनी प्रगतिशिल प्यानलको प्रथम उपाध्यक्षमा उठ्ने भएका छन् ।
मञ्चद्वयका तर्फबाट द्वितीय उपाध्यक्षमा मुक्ति अधिकारी र तृतीय उपाध्यक्षमा परमेश्वर अधिकारीको नाम चर्चामा रहेपनि बुधबार साँझसम्म निर्णय भएन । उल्लेखित पदहरुमा घटकसंस्थाहरुसँग छलफल गरेर मात्र ती पदमा टुंगो लगाउने अध्यक्षका उम्मेदवार पोखरेलले बताए । सो घटकले संघीय समाजवादी फोरम निकट व्यवसायीहरुसँग बुधबार छलफल गरेको छ ।
महासचिवमा आरसी गिरीको निर्णय भएको बताइएको छ । सचिवमा सञ्जु गुरुङ र कोषाध्यक्ष तेजुमाया लिम्बु उम्मेदवार बन्ने लगभग तय भएको बताइएको छ । औपचारिक रुपमा घोषणा भने भएको छैन ।
सो समूहका तर्फबाट आइतबार पाँच कार्यसमिति सदस्यका उम्मेदवारहरुको नाम सार्वजनिक गरिएको थियो । सार्वजनिक भएका ५ सदस्यका उम्मेदवारहरु मध्ये प्यासिफिक ह्युमेनका सञ्चालक नरेश पुन उम्मेदवारीबाट बाहिरिएका छन् ।
यता नेपाल लोकतान्त्रिक वैदेशिक रोजगार व्यवसायी फोरमका तर्फबाट संघको आगामी निर्वाचनमा उम्मेदवारी तय गर्न नेपाली काँग्रेसले सक्रियता देखाएको छ । बुधबार पार्टी सभापति शेर वहादुर देउवाले फोरमको कार्यसमिति, पूर्व अध्यक्ष एवं सल्लाहकारहरुलाई पार्टी कार्यालय सानेपामा बोलाई समग्र स्थितिको जानकारी लिएका थिए । पार्टीले पूर्व श्रम मन्त्री रमेश लेखकलाई संघको निर्वाचनमा फोरमका लागि प्रतिनिधि खटाएर पठाएको छ ।
बुधबार सभापति देउवासहित महामन्त्री शशांक कोईराला, विमलेन्द निधि लगायतका पार्टी पदाधिकारीको उपस्थितिमा भएको छलफल पछि सभापति देउवाले फोरममा आवद्ध सवै व्यवसायीहरुले अनुशासनको कडाईका साथ पालना गर्नुपर्ने र अनुशासन पालन नगरी वागी उम्मेदवार दिई अराजकता देखाउनेलाई तत्कालै अनुशासनको कारवाही प्रारम्भ गर्न पनि निर्देशन दिएको फोरमका पूर्व अध्यक्ष विमल ढकालले जानकारी दिए ।
मंगलबार पार्टी प्रतिनिधि लेखकको विशेष उपस्थितिमा अध्यक्षका आकांक्षीहरुबाट प्रस्तुत गरिएका अनुभव, जित्ने आधार र कारण सोधिएका थिए । एक शुत्रका अनुसार फोरमबाट अध्यक्षका लागि विष्णु गैरेको नाम पक्का पक्की जस्तै भएको छ भने संघका वर्तमान द्वितीय उपाध्यक्ष भुवनसिंह गुरुङलाई प्रथम उपाध्यक्षको प्रस्ताव गरिएको छ । उनले नमानेमा फोरमका पूर्व वरिष्ठ उपाध्यक्ष नरेन्द्र ढकाललाई उम्मेदवार बनाउने बताइएको छ । फोरमले बिहीबार मध्यान्हसम्म सबै उम्मेदवारहरुको टुंगो लगाउने फोरमका महासचिव तारानाथ अर्यालले मध्यान्हलाई बताए ।
यसैबीच संघको आगामी २७ औं साधारणसभा र निर्वाचनका लागि ६ सय ५८ म्यानपावर कम्पनीले प्रतिनिधि पठाएका छन् । हाल ८ सय ५४ म्यानपावर कम्पनी रहेका भएपनि प्रतिनिधि पठाउने अन्तिम अवधिसम्म ६ सय ५८ वटा म्यानपावर कम्पनीको मात्र प्रतिनिधि दर्ता भएको संघले जनाएको छ ।
संघले बुधबार साँझ ६ बजेसम्म प्रतिनिधिहरुको पत्र दर्ता गरेको थियो । संघले बुधबार नै निर्वाचन समितिलाई प्रतिनिधिको सूची प्रमाणित गरी हस्तानतरण गरेको संघका अध्यक्ष रोहन गुरुङले जानकारी दिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies