बर्दिया : बर्दियाको गेरुवा गाउँपालिकामा शैक्षिक गुणस्तर सुधार गर्न उत्प्रेरणा कार्यक्रम सम्पन्न भएको छ । गेरुवा गाउँपालिका ६ नम्बर वडा कार्यालयको सहयोग तथा नेपाल राष्ट्रिय गणेश माध्यमिक विद्यालयको आयोजनमा विद्यालय प्राङ्गणमा प्रार्थना व्यवस्थापन र असल विद्यार्थी तथा अभिभावकत्वसम्बन्धी उत्प्रेरणा कार्यक्रम आइतबार सम्पन्न भएको हो ।

३ दिनसम्म चलेको उत्प्रेरणा कार्यक्रममा आयोजक विद्यालयसहित वडामा रहेका दिव्यज्योति प्राथमिक विद्यालय गुप्तीपुर, जनकल्याण प्राथमिक विद्यालय लाहोरपुर, धर्ममक्त प्राथमिक विद्यालय बाजपुर, जनप्रिय प्राथमिक विद्यालय बेलभरिया र जामजानकी आधारभूत विद्यालय रामनगर गरी ६ वटा विद्यालयका शिक्षक, विद्यार्थी, विद्यालय व्यवस्थापन समिति र अभिभावकहरूलाई सहभागी गराइएको थियो ।

विद्यालयलाई अभिभावक विद्यार्थीको आकर्षणको केन्द्र बनाउँदै विद्यालयहरूको शैक्षिक गुणस्तर सुधार गरी सत प्रतिशत सिकाइ उपलब्धि हासिल गर्न तथा शिक्षक, विद्यार्थी, अभिभावक र विद्यालय व्यवस्थापन समितिलाई विद्यालयप्रति थप जिम्मेवार बनाउन उत्प्रेरणा तालिमको आयोजना गरिएको वडा अध्यक्ष कृष्णगोपाल चौधरीले बताए । 

कालिका मानवविज्ञान माध्यमिक विद्यालयका शिक्षक हरिश ओलीले दुई दिनसम्म व्यवस्थापन समिति, शिक्षक र विद्यार्थी एवम् एक दिन अभिभावक, व्यवस्थापन समिति, विद्यार्थी र शिक्षकलाई उत्प्रेरणा तालिम दिएका थिए । तालिमको अन्तिम दिन विद्यार्थीहरूले आफ्ना अभिभावकलाई टिका र माला लगाएर सम्मान गरेका थिए । नेपाली संस्कृतिअनुसार अभिभावकलाई छात्रहरूले ढोग र छात्राहरूले नमस्कारले सम्मान गरेका थिए । 

विद्यालयका प्रधानाध्यापक झक्क प्रसाद ढुंगानाले पछिल्लो समय विद्यालय परिवार शैक्षिक गुणस्तर सुधार्न लागिपरेको बताए । ‘तालिमबाट प्रार्थना व्यवस्थापन, विद्यार्थी, शिक्षक र अभिभावकको सम्बन्धलगायत धेरै विषयमा जानकारी प्राप्त भएको छ’, प्रधानाध्यापक ढुंगानाले भने, ‘सबै कक्षामा शतप्रतिशत नतिजा ल्याउन र विद्यार्थीलाई असल संस्कृतिको विकास गर्न कार्यक्रमले सहयोग पुर्‍याउने छ ।’ 

गाउँपालिका समग्र पालिकाकै शैक्षिक गुणस्तर वृद्धिको अभियानमा लागेको जनाउँदै आगामी दिनमा सामुदायिक विद्यालयको शैक्षिक गुणस्तर बढाउन र खोजेको जस्तो सिकाइ उपलब्धि प्राप्त गर्न तथा विद्यार्थी, शिक्षक र अभिभावक लाई आ–आफ्नो भूमिकामा थप जिम्मेवार बनाउन कार्यक्रमले महत्वपूर्ण सहयोग पुर्‍याउने गेरुवा गाउँपालिकाका सामाजिक विकास समितिका संयोजक निर्मल थारुले बताए ।