काठमाडौं : ४५ वर्ष उमेर हदलाई हटाउन माग गर्दै आन्दोलनमा उत्रिएका नेपाल एयरलाइन्सका विमान परिचारक÷परिचारिका (क्याबिन क्रु) आन्दोलन फिर्ता लिन सहमत भएका छन् ।
शनिबार संस्कृति, पर्यटन तथा नागरिक उड्डनमन्त्री बद्री पाण्डेको उपस्थितिमा भएको दुई चरणको छलफलपछि क्याबिन क्रु जारी आन्दोलन फिर्ता लिन सहमत भएका हुन् ।
छलफलपछि सरकार क्याबिन क्रुको ४५ वर्षे उमेर हदलाई बढाएर ५० वर्ष पुर्याउन तयार भएको छ । मन्त्री पाण्डेले नेपाल वायु सेवा निगमलाई ४५ वर्षको उमेर हदलाई ५० वर्ष बनाउन निर्देशन दिएका छन् ।
बैठकपछि सञ्चारकर्मीसँग कुरा गर्दै मन्त्री पाण्डेले क्याबिन क्रुहरुले आफूहरुमाथि भेदभाव भएको, विभिन्न सेवा, सुविधाबाट वञ्चित गरिएको, आफूहरुको सुनुवाइ राखेकामा सरकाुरले गम्भीरतापूर्वक लिएर समस्या समाधान गरेको बताए ।
हाल निगमको विनियमावलीमा क्याबिन क्रुको उमेर हद ४५ वर्ष छ, आफूले निगम व्यवस्थापनलाई त्यो व्यवस्था संशोधन गर्न निर्देशन दिएको मन्त्री पाण्डेले बताए । क्याबिन क्रुको उमेर ५ वर्ष थप्दा उनीहरुको अनुभवबाट निगमले धेरै फाइदा लिन सक्ने मन्त्री पाण्डेले बताए ।
मन्त्रालयसँगको सहमतिसँगै छलफलमा सहभागी विमान परिचारक/परिचारिकाहरु आन्दोलनका कार्यक्रम फिर्ता लिएर काममा फर्किने प्रतिवद्धता जनाएका छन् ।
.jpg)
