दोहा कतार : दोहामा आयोजित एसिया कोअपरेसन डायलगको तेस्रो सम्मेलनमा नेपाली प्रतिनिधिमण्डलको नेतृत्व गरी सहभागी हुन आएकी परराष्ट्रमन्त्री एवम् नेपाली कांग्रेसकी केन्द्रीय सदस्य डा. आरजु देउवा राणासँग नेपाली जनसम्पर्क समिति कतारले भेटघाट गरेको छ । नेपाली राजदूतावास कतारको सभा हलमा  छोटो स्वागत, सम्मान तथा भेटघाट कार्यक्रम सम्पन्न गरेको हो ।

समितिले भेटघाटका क्रममा मन्त्रीलाई कतारका श्रमिकहरूको राहदानी नवीकरण, श्रम सम्झौतालगायत अन्य मुख्य समस्याहरूप्रति ध्यानाकर्षण गराएको छ । कार्यक्रम तथा समितिका सभापति मोहम्मद अजिज अलीले कतारमा रहेका साढे तीन लाख नेपाली श्रमिकहरूले पासपोर्ट नवीकरणसम्बन्धी देखिएको समस्यालाई नेपाल फर्कने बित्तिकै प्राथमिकतामा राखेर समाधान गर्न ध्यानाकर्षण गराएका थिए । अलिले श्रम सम्झौता नवीकरण गर्दा हूने झन्झटिलो प्रक्रियालाई सहज सुलभ बनाउन पनि सुझाव दिएका छन् ।

पासपोर्ट नवीकरणका समस्याबारे समितिका संस्थापक महामन्त्री विमल सुवेदीले केही समयका लागि दूतावासमा कर्मचारी थपेर भएपनि काम गर्न सकिएन भने धेरै श्रमिकले जागिर गुमाउन बाध्य हुनुपर्ने गम्भीर स्थिति आएको बताए । भेटघाटमा नेपालबाट आउने श्रमिकहरूले म्यानपावर कन्सल्टेन्सीदेखि आजाद भिसाका नाममा ठगिनु परेका अन्य समस्याहरूका बारेमा मन्त्रीलाई ध्यानाकर्षण गराइएको थियो ।

पार्टी केन्द्रीय बैठकको जनसम्पर्क समितिसम्बन्धी पछिल्लो निर्णय सच्चाउन दबाब दिन आग्रह गरिएको सभापतिले मध्यान्ह दैनिकसँगको कुराकानीमा बताए । कार्यक्रमको प्रमुख आतिथ्यता समेत ग्रहण गरेकी मन्त्री राणाले यहाँ उठेका विषयले श्रमिकका समस्या बारे धेरै कुरा बुझ्नेअवसर पाएको भन्दै जनसम्पर्क समितिलाई धन्यवाद ज्ञापन गरिन् ।

कार्यक्रममा संस्थापक सभापति नरेन्द्र भाट, महाधिवेशन प्रतिनिधिहरू क्रान्ति सिंह, शंकर न्यौपाने, राज रेग्मी, प्रमुख सल्लाहकार र सल्लाहकारहरूका साथै इकाइ प्रमुखहरूको उपस्थिति रहेको थियो । कार्यक्रमलाई उपसभापति ठाकुर कुमार परियारले स्वागत गरेका थिए भने सहमहामन्त्री खगेन्द्र खनालले कार्यक्रमलाई सहजीकरण गरेका थिए ।