कतार : नेपाली महिला समाज कतार र गैरआवासीय नेपाली संघ, राष्ट्रिय समन्वय परिषद्(एनआरएनए एनसीसी) कतारले ‘हरितालिका तिज’कार्यक्रमको आयव्यय सार्वजनिक गरेको छ  । शुक्रबार साँझ सम्पन्न सम्मान तथा समीक्षा कार्यक्रममार्फत हजार ४५ हजार ५ सय ५८ रियाल आम्दानी, ३५ हजार ७ सय २० रियाल खर्चँदै ९ हजार ८ सय ३८ रियाल रकम बचेको जानकारी एनसीसी कतारका कोषाध्यक्ष बुद्ध पाण्डेले जानकारी दिए । 

कार्यक्रमबाट भएको बचत रकम महिला समाज र एनसीसीले बराबर रकम श्रमिकको हितमा खर्च गर्ने भद्र सहमति भएको कार्यक्रमका प्रमुख अतिथि तथा एनसीसी कतारका अध्यक्ष रमेश भट्टले बताए । 

कतारमा स्थापित विभिन्न ६५ वटा संघ–संस्थाहरुको संयुक्त आयोजनामा नेपाली नारीहरूको महान् पर्व ‘हरितालिका तिज’ को अवसरमा आयोजित शुभकामना आदानप्रदान तथा सचेतनामूलक कार्यक्रम सम्पन्न भएको थियो । उक्त कार्यक्रममा सांगीतिक प्रस्तुति दिने कलाकार, आयोजक संस्था, आर्थिक सहयोगी र विशेष विषयमा सचेतना प्रदान गर्ने व्यक्तित्वहरू सहित सञ्चारकर्मीहरूलाई मायाको चिनो सहित सम्मान गरिएको थियो । 

महिला समाजकी महासचिव मेनुका खतिवडाले सहजीकरण गरेको कार्यक्रमको समापन गर्दै कार्यक्रमकी सभापति तथा महिला समाजकी अध्यक्ष माया केसीले कार्यक्रम कसरी शान्ति पूर्वक सम्पन्न गर्ने भन्ने मै आफ्नो ध्यान रहेको बताइन् । उनले आफूले नाफा घाटा भन्दा पनि मायाको चिनोले सहकार्यको स्मरणलाई जीवन्त बनाउने विश्वास व्यक्त गरिन् ।

केसीले कार्यक्रम सम्पन्न गर्न विभिन्न फरक–फरक कोणबाट धेरै मानिसहरूसहित संस्थाहरूले सहयोग गरेर मात्र सम्भव भएको बताउँदै सबैको नाम लिन नसके पनि अन्तर मनबाट सबैलाई सदा सम्झिने र भविष्यमा पनि महिला समाजले साथ पाउने विश्वास व्यक्त गरिन् । 

कार्यक्रममा एनसीसी कतारकी महिला विभाग संयोजक सुष्मा खतिवडा कटुवालले स्वागत मन्तव्य राखेकी थिइन् ।