कपिलवस्तु : कपिलवस्तुको कृष्णानगर नगरपालिका,महराजगञ्ज नगरपालिका तथा विजयनगर गाउँपालिकामा नदी कटान तथा बाढी प्राभावित २ सय ३० घर–परिवारलाई यूएई सरकारको सहयोगमा राहत वितरण भएको छ ।
नेकपा एमालेका केन्द्रीय सल्लाहकार तथा पूर्वमन्त्री समेत रहेका अकबाल अहमद शाहले दूतावासका राजदूत अब्दुल्ला अल शम्सी लगायत सम्बन्धित निकायसँगको समन्वयमा राहत वितरण गरिएको बताए । पीडित परिवारको लागि नेपालमा रहेको दुबई दूतावासका राजदूत अब्दुल्ला अल शम्सीले दुबई सरकारको तर्फबाट खाद्यान्न सामग्री राहत वितरण गरेका छन् ।
कपिलवस्तुको महराजगञ्ज नगरपालिका– १० हर्दौना गाउँका नदी कटान र बाढी प्रभावित ३८ घर–परिवार, कृष्णानगर नगरपालिका वडा नं ४ र १२ का ७८ घर–परिवार,विजयनगर गाउपालिका का वडा ३मा ३५ घर–परिवार, वडा ५ र ७ का ८० घर–परिवारहरुमा दुबई इमेरात रेड क्रिसेंटको तर्फबाट राहत सामग्री वितरण गरिएको पूर्व मन्त्री शाहले बताए ।
दुबई सरकारले नेपालमा प्राकृतिक विपत्ति समय वा अन्य समयमा समेत सहयोग गर्दै आएको छ । विपत्तिका बखत नेपाली जनतालाई दुबई सरकारले साथ र सहयोग गर्दै आएको छ ।
दुबई सरकार र नेपाल सरकारको मित्रता सदैव कायम रहोस् भन्ने कामनाका साथ दुबईका राजा शैख मोहम्मद बिन राशिद अलमकतुम तथा राजदूत अब्दुल्ला अल शम्सीलाई पूर्वमन्त्री अकबाल अहमद शाहले व्यक्त गरे ।
कपिलवस्तुका नदी कटान तथा बाढी प्रभावित क्षेत्रमा थप राहत वितरण हुने पूर्व मन्त्री शाहले प्रतिबद्धता समेत जनाए ।
महराजगञ्ज नगरपालिका–१० हर्दौनामा राहत वितरण कार्यको प्रशंसा गर्दै स्थानीय समाजसेवी माबुद खाँ तथा मेयर पद प्रत्याशी रामदास चौधरीले हर्दौना गाउँका नदी कटान रोक्नका लागि छिटै पहल गर्नुपर्नेमा जोड दिएका छन् ।
उनले समयमै ठोस पहल नभए पुरै गाउँ नै नदी कटानको उच्च जोखिममा रहेको बताए । यस्तै कृष्णानगर नगरपालिका वडा १२ तथा विजयनगर गाउपालिका वडा ३,५ र ७ का जनताहरुले पनि हाम्रो खेत जग्गा तथा फसल समेत प्रत्येक वर्ष नदी कटान तथा बाढीले फसल नोक्सानी भइ रहेको छ र यसको लागि सम्बन्धित निकायले समयमा ठोस पहल गरेन भने हामी जग्गा विहीन हुनेछु भन्दै आफ्नो दुःख सुनाए । राहत वितरणले पीडितलाई ठूलो सहयोग भएको भन्दै उनले प्रशंसा समेत गरे ।
पूर्व मन्त्री शाहको प्रयासमा दुबई सरकारले गरेको राहत वितरणले पीडित परिवारहरुलाई निकै सहयोग पुगेको भन्दै धन्यवाद समेत व्यक्त गरे ।
राहत वितरण कार्यक्रममा विजयनगर गाउँपालिका वडा नं.३ का वडाध्यक्ष हृदय विकास चौधरी, वडा ५ का वडाध्यक्ष मोहम्मद अनवर,वडा ७ का वडाअध्यक्ष दिनेश कुमार चौधरी लगायत समाजसेवी सुरक्षाकर्मीहरुको उपस्थिति थियो ।
.jpg)
