सहकारी बचत रकम ठगी आरोपमा रवि लामिछाने पक्राउ परेपछि राष्ट्रिय स्वतन्त्र पार्टी (रास्वपा) ले सडक संघर्षको बाटो रोजेको छ । पार्टी सभापति लामिछानेलाई गोर्खा मिडिया नेटवर्क मार्फत् ६५ करोड रुपैयाँ अपचलनको आरोप लागेबाटै रास्वपाका नेता–कार्यकर्ता बचाउमा बोलिरहेका थिए । सहकारी बचत रकम ठगीको आरोपमा रास्वपा संसदीय छानबीनकै निम्ति तयार थिएन । जबकी पीडितहरुले लामिछानेको नामै किटेर जाहेरी दिएका थिए । सामान्यतयाः किटानीसहित जाहेरी परेपछि प्रहरीले अनुसन्धान अगाडि बढाउने गर्छ । तर रास्वपाकै सभापतिविरुद्ध जाहेरी परेकाले प्रहरीले छानबीन अगाडि बढाएन । बरु यो अवधिमै रवि दुईपटक गृहमन्त्री भइसके । प्रहरीकै विभागीय मन्त्रीमाथि छानबीन हुने कुरै भएन । तर प्रतिनिधि सभाको सवैभन्दा ठूलो दल नेपाली कांग्रेसले रविमाथि छानबीनको अडान राख्यो । संसदीय छानबीनकै मागसहित प्रतिनिधि सभा चल्न नदिएपछि एमाले सांसद सूर्यबहादुर थापा क्षेत्रीको नेतृत्वमा समिति बन्यो ।
त्यो समितिले ९९ दिन लगाएर प्रतिवेदन तयार पार्यो । प्रतिवेदनले रवि लामिछानेलाई समेत दोषी ठहर गर्दै कारबाहीको सिफारिस गरेको थियो । तर रवि र रास्वपा भने समितिको प्रतिवेदनप्रति नै गलत तर्क गरिरहेका छन् । उनीहरुको दाबी बमोजिम रवि निर्दोष हुन् । समितिको प्रतिवेदनबाट आफू निर्दोष सावित भएको तर्क लामिछानेको छ । तर प्रहरीले शुक्रबार रविलाई पक्राउ गर्यो । रवि समातिएपछि रास्वपाका नेता–कार्यकर्ता त्यसको प्रतिवादमा उत्रिएका छन् । रविलाई केन्द्रीय कार्यालय बनस्थलीबाट समातेर पोखरा लगिएपछि रास्वपाका अधिकांश नेताहरु पनि त्यही पुगेका छन् । पोखरा पुगेका नेता–कार्यकर्ताले शनिबार प्रदर्शन गरे । राजधानी उपत्यकामा पनि रविका समर्थकहरुले प्रदर्शन गरे । पक्राउ अघि रविले आमसाधरणसँग प्रदर्शनमा उत्रन अपिल गरेका थिए । उनको अपिल मान्नेहरुले प्रदर्शन गरिरहेका छन् । समर्थक र कार्यकर्ता उतारेर रास्वपाले रवि समातिनुको कारण राजनीतिक प्रतिशोध रहेको भाष्य स्थापित गर्न चाहेको देखिन्छ ।
रास्वपाका सभापति लामिछानेले पक्राउ अगाडि अदालतको न्यायिक निर्णयप्रति समेत शंका गरे । उनले अदालतबाट आफू दोषी ठहर भए त्यो सेटिङ हुने सन्देश दिन खोजेको सहज अनुमान लगाउन सकिन्छ । त्यसैले अदालतमा पनि मिलाउने काम भएको जानकारी आफूसँग रहेको उनले बताएका थिए । रवि र रास्वपाको चाहना जसरी हुन्छ निर्दोष ठहरिने रहेको प्रष्ट हुन्छ । तर निर्दोष सावित हुने अस्त्र चाहिँ सडक प्रदर्शन बनाउने उद्देश्य प्रष्ट छ । जबकी यो बेला रास्वपाले अनुसन्धानमा सहयोग गर्नुपर्ने हो । ‘संसदीय छानबीन समितिबाट दोषी ठहर भएकाले थप अनुसन्धान गर्न हामी सहयोग गर्छौ, अरु दलका नेताहरुले पनि त्यस्तै हिम्मत गर्नुपर्छ’ भन्ने माग राख्नुपर्ने हो । तर अहिले रास्वपाका नेताहरुले अरु दलमा पनि भ्रष्टहरु रहेकाले आफ्ना सभापतिलाई छोडिदिनुपर्छ भन्ने जस्तो तर्क गरिरहेका छन् । रास्वपाको प्रवृत्तिले विधिको शासन र संविधानवादलाई कमजोर बनाउने प्रष्ट छ । रास्वपाले गलत बाटो हिड्न हुन्न । यदि रवि निर्दोष भए सडकबाट होइन, न्यायिक निकायबाटै सावित हुनुपर्छ । सही बाटो त्यही हो ।
