डोल्पा : हिमाली जिल्ला डोल्पाको त्रिपुरासुन्दरी नगरपालिका १ त्रिपुराकोटको बगर बजारमा पार्किङ गरी राखेका चार वटा मोटरसाइकलमा आगजनी गरिएको छ । बिहीबार मध्यरातको समयमा एक होटल बाहिर पार्किङ गरेर राखिएका चार वटा मोटरसाइकलमा आगजनी भएको हो ।
डोल्पाको शे-फोक्सुण्डो गाउँपालिकामा पर्ने फोक्सुण्डो ताल घुम्न आएका जुम्लाका चार जनाको मोटरसाइकल अज्ञात समूहबाट आगजनी भएको प्रहरी चौकी त्रिपुराकोटले जनाएको छ ।
आगजनी गरिएका चारमध्ये दुई मोटरसाइकल पूर्णरूपमा क्षति भएको र दुई वटा आगोको रापले आंशिक क्षति भएको जिल्ला प्रहरी कार्यालय डोल्पाका प्रहरी नायव उपरीक्षक हरिकृष्ण केसीले जानकारी दिए ।
घटनाका विषयमा अनुसन्धान गर्न जिल्ला प्रहरी कार्यालय डोल्पाका प्रहरी निरीक्षक मनिष थापासहितको प्रहरी टोली घटनास्थलमा पुगेको प्रहरी उपरीक्षक केसीले बताए । आगजनी भएको एउटा मोटरसाइकल भौतिक पूर्वाधार मन्त्रालय कर्णाली प्रदेशको रहेको प्रहरीले जनाएको छ ।
