डोल्पा : डोल्पाको त्रिपुरासुन्दरी नगरपालिकाको त्रिपुराकोट स्वास्थ्य चौकीमा सञ्चालित दुई दिने निःशुल्क विशेषज्ञ स्वास्थ्य शिविरमा एक हजार चार सय १६ जनाको स्वास्थ्य परीक्षण भएको छ ।
कर्णाली प्रदेश सरकार सामाजिक विकास मन्त्रालयको आयोजना तथा त्रिपुरासुन्दरी नगरपालिका डोल्पाको समन्वयमा दुई दिने शिविरको आयोजना गरिएको थियो । शिविरमा आँखा, कान, घाँटी, नाक, हाड जोर्नी, लगायतका बिरामीहरुले स्वास्थ्य परीक्षण गराएका छन् ।
त्रिपुरासुन्दरी नगरपालिकाका स्वास्थ्य शाखा प्रमुख तुलबहादुर श्रेष्ठले पहिलो दिनमा ९ सय ४४ जनाको स्वास्थ्य परीक्षण भएको र शिविरको अन्तिम दिन शनिबार ४ सय ७२ गरी जम्मा १ हजार चार सय १६ जनाले सेवा लिएको बताए । उनका अनुसार स्वास्थ्य परीक्षण गराएका मध्य सबैभन्दा बढी हाडजोर्नी तथा नशा सम्बन्धिका बिरामी रहेको पाइएको छ ।
दुई दिने निःशुल्क विषेशज्ञ स्वास्थ्य शिविरको शुक्रबार कर्णाली प्रदेश सरकारका सामाजिक विकास मन्त्री घनश्याम भण्डारी, मन्त्रालयका सचिव दीर्घ बहादुर पोख्रेल लगायतको टोलीले संयुक्त रुपमा शिविरको उद्घाटन गरेका थिए ।
त्रिपुरासुन्दरी नगरपालिका, नेपाल रेडक्रस सोसाइटी, तिलगंगा आँखा अस्पताल, सुर्खेत आँखा अस्पतालको आर्थिक तथा प्राविधिक सहयोगमा तथा नेपाल रेडक्रस डोल्पा शाखा दुनै र उपशाखा त्रिपुराकोट डोल्पाको आयोजनामा निःशुल्क मोतियाबिन्दु शल्यक्रिया आँखा शिविरको समेत सञ्चालन गरिएको थियो ।
आँखा शिविरमा ४९ जनाको आँखाको शल्यक्रिया समेत गरिएको छ । कर्णाली प्रदेशका स्वास्थ्य सेवा निर्देशक डाक्टर रविन खड्काको नेतृत्वमा डा.सुशीला समदर्शी, डा.संजोग शिवाकोटी,डा.जागृति खनाल, डा.गणेश तिवारी, डा.लक्ष्मीनारायण तिवारी र डा.तेजेन्द्र अधिकारी सहितको विशेषज्ञ चिकित्सकको टोलिबाट स्वास्थ्य परीक्षणका साथै उपचार गरिएको थियो ।
निःशुल्क विशेषज्ञ स्वास्थ्य शिविरमा बढीभन्दा बढी नागरिकले स्वास्थ्य सेवा लिन सकुन् भनेर कात्तिक ९ गतेदेखि त्रिपुरासुन्दरी नगरपालिकाका एघार वटै वडामा नगरपालिका स्वास्थ्यकर्मी परिचालन गरी आँखाका बिरामीको छनोट तथा अन्य रोगका बिरामीको लागि शिविरमा आउन सहज होस् भनि घरदैलोमा पुगेर प्रचार–प्रसार समेत गरिएको थियो ।
