–गणेश लोहनी
१.
विषको वृक्षमा अमृत फलाउन अघि सर्दैछौं
काखमा राखी गला रेट्नेहरूकै शरण पर्दैछौं
घाउमा नुन चुक छर्कन लाम बद्ध छ दुनियाँ
व्यर्थै मल्हम लगाइदिनेहरूको खोजी गर्दैछौ ।।
२.
दिनानुदिन जनताका दरकारहरू बढेका छन्
देखिने र भोग्ने गरेर कर–कारहरू बढेका छन्
उल्लेखनीय कार्य मात्र दल गठबन्धन बदल्नु
सिंहदरबारको नाममा सरकारहरू बढेका छन् ।।
३.
उर्वर सबल युवा शक्ति खाडीतिर जलेकै छ
समृद्धिको सपना हाम्रो धरहरा झैं ढलेकै छ
गहिरोमै ताल पर्छ बजेट देखाउने दाँत न हो
सुगठित साहुहरूको ढ्याके चोके चलेकै छ ।।
.jpeg)
.jpg)
