काठमाडौं : नेपाल प्रिमियर लिग (एनपीएल) क्रिकेटको फाइनल भिडन्त शनिबार हुँदै छ । फाइनलमा सुदूरपश्चिम रोयल्स र जनकपुर बोल्ट्स भिड्दै छन् । खेल कीर्तिपुरस्थित त्रिवि क्रिकेट मैदानमा शनिबार दिउँसो १२ः३० बजे हुने छ ।
नेपाली दर्शकले फाइनल खेललाई ‘एल क्लासिक’को संज्ञा दिएका छन् । पहिलो क्वालिफायरमा सुदूरपश्चिमसँग पराजित भएर दोस्रो क्वालिफायर खेलेको जनकपुरले कर्णाली याक्सलाई २ विकेटले हराउँदै पुनः सुदूरपश्चिमसँगको फाइनल भेट पक्का गरेको हो ।
एनपीएलमा सुदूरपश्चिम र जनकपुरले २ खेल खेलेका छन् । यी २ खेलमा जनकपुरमाथि सुदूरपश्चिम हाबी भएका थिए । सुदूरपश्चिमसँग भएका २ भेटमा पराजयको सामना गरे पनि जनकपुरले अन्य टिमसँग प्रतिस्पर्धात्मक र शानदार खेल प्रदर्शन गरेको छ । दोस्रो क्वालिफायरबाट फाइनल पुगेको जनकपुरलाई कमजोर आँक्न मिल्दैन ।
फाइनल पुगेका यी २ टोली लिग चरणको खेलमा २६ मंसिरमा आमनेसामने भएका थिए । उक्त खेलमा पनि सुदूरपश्चिमले ७२ रनको सहज जित निकालेको थियो ।
पहिलो क्वालिफायर र लिग चरणका यी २ खेललाई तुलना गर्दा सुदूरपश्चिमभन्दा जनकपुर कमजोर देखिन्छ । तर, समग्र प्रतियोगितामा जनकपुरको प्रदर्शन हेर्न लायक छ । उपाधिका लागि सुदूरपश्चिम जति दाबेदार छ, जनकपुर पनि त्यत्तिकै ठूलो दाबेदारका रूपमा खडा भएको छ ।
सुरुका ३ खेल र अन्तिमका ३ खेलमा विजयी भएको सुदूरपश्चिमले लिग चरणमा एउटा मात्र पराजय भोगेको छ । चौथो खेलमा चितवनले सुदूरपश्चिमलाई ३३ रनले हराउँदै एउटा हारको स्वाद चखाएको थियो । अन्य खेलमा भने सुदूरपश्चिमले शानदार जित निकालेको छ ।
