काठमाडौं- सिद्धार्थ बैंक नेपाल प्रिमियर लिग (एनपिएल) को सफल आयोजना गरेको नेपाल क्रिकेट संघ (क्यान) ले यो सिजनमा तीन वटा सिनियर राष्ट्रिय प्रतियोगिता सञ्चालन गर्दैछ । जसमा दुई वटा पुरुष र एक महिलाको प्रतियोगिता छ ।
पुसको अन्तिम सातादेखि पर्सा र धनुषामा एलाइट कप दुई दिवसीय पुरुष राष्ट्रिय प्रतियोगिता आयोजना गर्दैछ । मिति घोषणा गर्न बाँकी रहेको प्रतियोगितामा चार टोली सहभागी हुनेछन् । अघिल्लो वर्ष भएको प्रधानमन्त्री कप एकदिवसीय राष्ट्रिय प्रतियोगिताको शीर्ष चार टोलीले एलाइट कपमा भाग लिनेछन् ।
गत वर्षको च्याम्पियन नेपाल पुलिस क्लब, उपविजेता त्रिभुवन आर्मी क्लब तथा शीर्ष चारमा पुगेका बागमती र मधेस प्रदेशले प्रतियोगिता खेल्दैछन् । यस्तै सुदूरपश्चिममा प्रधानमन्त्री कप महिला राष्ट्रिय प्रतियोगिता सञ्चालन गर्ने तयारी क्यानको छ ।
यो प्रतियोगिता लगत्तै प्रधानमन्त्री कप पुरुष राष्ट्रिय एकदिवसीय प्रतियोगिता हुनेछ । गत वर्ष राउन्ड रोबिन लिगको आधारमा सञ्चालन भएको प्रधानमन्त्री कप एकदिसीय प्रतियोगिता तीन वटा मैदानमा भएका थिए । प्रतियोगिताको यो सिजनको स्थान अझै तय गरिएको छैन । कीर्तिपुर मैदानमा फ्लड लाइट र प्यारापिटको काम सुरु नभएको अवस्थामा क्यानले प्रधानमन्त्री कप काठमाडौंमा गर्नेछ ।
